"Амгалан" станцын I зууханд гэмтэл гарсан тул ХАЛУУН, ДУЛААНЫГ хаалаа

Өчигдөр /2023.01.08/ оройноос Баянзүрх дүүргийн зарим хороодод халуун ус тасарсан талаар өмнө нь мэдээлсэн. Үргэлжлүүлэн нөхцөл байдал юунаас үүдэж бий болсныг тодруулахаар албаны эх сурвалжуудтай холбогдлоо.

Улаанбаатар Дулааны сүлжээний 7004-7005 дугаарын утсанд холбогдож, мэдээлэл авахад "Өчигдөр орой манайд "Амгалан" станцаас захиалгат ажил орж ирсэн. Ямар гэмтэл гарсан талаарх мэдээлэл алга" гэсэн юм.

Харин Диспетчерийн үндэсний төвтэй холбогдоход "Амгалан станцын I зууханд доголдол гарсан тул халуун, дулааныг хэсэгчлэн зогсоож, II, III зуух руу шилжүүлсэн. Шөнийн 00:00 цагаас "Амгалан" дулааны станцын ажилчид гэмтлийг тодорхойлж, устгахаар ажиллаж байна. Тиймээс иргэд хүлээцтэй байж, гэмтлийг арилгатал хэрэглээгээ зохицуулна уу. Бид аль болох богино хугацаанд үйл ажиллагааг хэвийн болгох болно" гэлээ.