Монголд 10 хувийн татвар: Трамп дэлхий дахинд худалдааны дайн зарлалаа

Хоёр сар гаруй хугацаанд бэлдсэний дараа АНУ-ын Ерөнхийлөгч Доналд Трамп дэлхий дахинд худалдааны дайн зарлалаа.

Цагаан ордны цэцэрлэгт хүрээлэнд Трамп дөрөвдүгээр сарын 2-ныг "Эдийн засгийн тусгаар тогтнолын өдөр" хэмээн зарлаж, өнгөрсөн зуунаас хойш байгаагүй татварын тогтолцоо нэвтрүүлж байгаагаа мэдэгдлээ.

Худалдааны саад тотгор найз нөхөд хийгээд дайсагнагч орнуудыг мөнгө санхүүгийн болон газар нутгийн буулт хийхэд хүргэнэ гэж үзэж байна.

Эдийн засагчид Трампын импортын татварын улмаас бүх хүнд, тэр дундаа америкчуудад амьдрахад илүү хүнд болно гэж сануулж байна.

Трамп зарлиг буулгахдаа Хятадын бараа бүтээгдэхүүнд 34 хувь, Европын холбоонд 20 хувь, Японд 24 хувь, Энэтхэгийн бараа бүтээгдэхүүнд 26 хувийн татвар ногдуулжээ.

Монгол Улсын бараа бүтээгдэхүүний хувьд АНУ 10 хувийн татвар ногдуулах шийдвэр гаргалаа.