Цагаан давааны хогны цэгийг нөхөн сэргээж эхэллээ

"Тэрбум мод” үндэсний хөдөлгөөний хүрээнд Цагаан давааны хогийн цэгийг ойжуулж, ногоон бүс болгон өөрчлөх ажил /2026.05.16/ албан ёсоор эхэллээ.

Энэхүү төслийн хүрээнд Цагаан давааны 15 га талбайд 312,000 ширхэг хайлаас мод тарьж, хогийн цэгийн тоосжилтыг бууруулах, агаар дахь хорт бодисыг шүүх “Ногоон хэрэм” байгуулах юм. Мөн хөрсийг бэхжүүлэх, метан хийн тархалтыг бууруулах, иргэдийн эрүүл мэндэд үзүүлэх сөрөг нөлөөг багасгах стратегийн ач холбогдолтой төсөл болж байна. 

Бүх нийтээр мод тарих өдрийг тохиолдуулан төр, хувийн хэвшил, сайн дурын ажилтнууд, мэргэжлийн холбоод болон иргэдийн 1100 гаруй төлөөлөл оролцож, 3500 гаруй суулгац тарилаа.