МХЕГ: Архины үйлдвэрүүдэд шалгалт оруулна

Монгол Улсын Засгийн газрын 2018 оны 03 дугаар сарын 27-ны өдрийн 15 дугаар тэмдэглэлээр согтууруулах ундаа үйлдвэрлэх тусгай зөвшөөрлийг түдгэлзүүлсэн, үйлдвэрийн байрыг өргөтгөх шинэчлэх, хаяг байршилаа өөрчилсөн гэсэн шалтгаанаар Захиргааны ерөнхий хуулийн дагуу хариу тайлбар ирүүлсэн 32 аж ахуй нэгжид 2019 онд багтаан хяналт шалгалт явуулах шийдвэр гарсантай холбогдуулан МХЕГ-ын Хүнсний аюулгүй байдал, хөдөө аж ахуйн хяналтын газраас эдгээр аж ахуй нэгжүүдийн удирдлагуудтай уулзалт зохион байгууллаа.

Уулзалтаар Засгийн газраас гарсан тогтоол шийдвэрийн талаар танилцуулж,  2019 оны эхний улиралд зохион байгуулагдах хяналт шалгалтаар үйл ажиллагаа явуулаагүй,  тусгай зөвшөөрлийг сунгах  нөхцөл, шаардлагыг хангаагүй аж ахуй нэгж байгууллагуудын тусгай зөвшөөрлийг хүчингүй болгох санал, дүгнэлтийг Засгийн газарт тавьж, шийдвэрлүүлнэ гэдгийг анхааруулав.

Монгол Улсын Засгийн газрын “Архидан согтуурахтай тэмцэх талаар авах зарим арга хэмжээний тухай” 46 дугаар тогтоол, Улсын Ерөнхий байцаагчийн албан даалгаврын хүрээнд 2017 онд улсын хэмжээнд согтууруулах ундааны үйлдвэрүүдэд хяналт шалгалт хийж 16 аж ахуй нэгжийн тусгай зөвшөөрлийг хүчингүй болгосон аж.

Б.ЦОГ

WWW.ZINDAA.MN