Прокурор асан Х.Тамир нарын хар тамхины хэргийг шүүхэд шилжүүллээ

Одоогоос гурван жилийн өмнө Тээврийн прокурорын газрын хяналтын прокурор асан Х.Тамир, Тагнуулын ерөнхий газарт ажиллаж байсан Б.Амарбаясгалан нарын нэр бүхий таван хүн хар тамхины хэрэгт холбогдсон байдаг. Ингээд 2017 оны нэгдүгээр сарын 11-ний өдөр нийслэлийн Баянгол дүүргийн Эрүүгийн хэргийн анхан шатны шүүхэд дээрх хэргийг хэлэлцэж, Х.Тамир нарт 5-аас 6.5 хүртэлх жилийн хорих ял оноож байв.

Гэвч ялтнууд шүүхийн шийдвэрийг эсэргүүцэн, давж заалдах шатны шүүхэд хандсан байдаг. Улмаар хэргийг задлан, дахин холбогдогч нар нэмэгдсэнээр мөрдөн байцаалтын ажиллагааг тусгай субъектээр шалгаж байх хугацаанд тэд дахин мансууруулах бодис хэрэглэж байгаад үйлдэл дээрээ баригдсан байдаг.

Давтан хэргийн талаар тодруулбал, өнгөрөгч тавдугаар сарын 25-ны өдөр хувийн автомашиндаа хар тамхи хэрэглэсэн байжээ. Улмаар сэжигтнүүдээс шээсний дээж авч шинжлэхэд мансууруулах бодис хэрэглэсэн нь тогтоогдсон гэх ба хэргийн газраас айс буюу метафетамин хураан авсан байдаг. Мөн уг хэрэгт Х.Тамир нарын өмгөөлөгч О гэгч нэр холбогдоод байсан билээ.

Тэгвэл дээрх хэргийн мөрдөн байцаалт дуусч, хэргийг Баянгол, Хан-Уул, Сонгинохайрхан дүүргийн шүүх рүү шилжүүлжээ. Зарим эх сурвалжийн мэдээлснээр, Х.Тамир нарын өмгөөлөгч уг хэрэгт холбогдсон гэх боловч тэрбээр өмгөөллийн үйлчилгээгээ хэвээр үргэлжлүүлж байгаа аж.

Б.ЦОГ

WWW.ZINDAA.MN