Их Британи Хонконгийн гурван сая оршин суугчдад зориулж визийн дүрмээ өөрчилнө

Я.Болор | Zindaa.mn
2020 оны 06 сарын 03

Их Британийн Ерөнхий сайд Борис Жонсон хэрэв БНХАУ үндэсний аюулгүй байдлын тухай хууль баталбал Хонконгийн гурван сая оршин суугчдад Их Британийн иргэншил авах боломж олгоно гэж мэдэгджээ.

“The Times” сонинд бичсэнээр, энэ нь Их Британийн визийн системийн түүхэнд гарах хамгийн том өөрчлөлт болно. Үндэсний аюулгүй байдлын тухай хууль тус хоёр улсын хооронд байгуулсан Хонконгийн өөртөө засах эрхийн баталгаажуулсан гэрээг зөрчиж, Хонконгийн энэ эрхэнд ноцтой аюул учруулна гэж Борис Жонсон мэдэгджээ. Бээжин энэ хуулийг баталсан тохиолдолд Британийг Хонконгийн ард түмэнтэй холбодог гүн найрамдалт, түүхэн харилцааг дэмжихээс өөр сонголтгүй болно гэж тэрбээр онцолжээ.

Өдгөө Хонконгийн 350 мянган оршин суугч Британийн давхар иргэншилтэй бөгөөд Их Британид зургаан сар визгүй зорчих эрхтэй. Их Британийн Засгийн газар Хонконгийн 2.58 сая оршин суугчдад нэмж Их Британид визгүй зорчих хугацааг 12 сар хүртэл сунгах, үргэлжлүүлэн сунгах, ажил хийх эрх бүхий цагаачлалын виз олгох замаар тус улсын иргэншил авах боломжийг нээнэ гэж Борис Жонсон онцолжээ. Тэрбээр Хятад улсаас олон улсын гэрээ, хэлэлцээрээр хүлээсэн үүргээ биелүүлэхийг хүлээх болно гээд Их Британи энэ асуудлыг дэлхийн тавцанд тавьсаар байх болно гэж мэдэгджээ.

БНХАУ-ын гадаад хэргийн яамны албан ёсны төлөөлөгч Жао Лизян хэрэв Их Британи BNO паспорт эзэмшигч хонконгчуудын хувьд визийн өөрчлөлт оруулбал хариу арга хэмжээ авна гэж мэдэгдэж байсан билээ.

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
зочин (66.181.189.248) 2020 оны 06 сарын 04

британичууд хүмүүсийг нь виз гаргаад татаад авчихвал газар нутаг нь хятадад үлдээд зүгээр юм биш үү ардчилал хүсэгч нарыг хөөж явуулбал таарна

0  |  0
Top