И Гун ахмад AFP агентлагт ярилцлага өглөө

Украинд Оросын армийн эсрэг байлдаж байсан Өмнөд Солонгосын тусгай хүчний ахмад асан И Гун шархаа эмчлүүлэхээр тавдугаар сарын 27-нд эх орондоо харьсан талаар бид мэдээлсэн.

Түүнийг Инчёны нисэх буудалд газардангуут Цагдаагийн газраас түүний хил гарах, гадаад явах эрхийг хасан, мөрдөн шалгах ажиллагаагаа эхэлснээ мэдэгдсэн.  БНСУ-ын Цагдаагийн газраас түүнд хил хууль бусаар давсан, Украинд очихыг хориглосон Засгийн газрын дүрэм журмыг зөрчсөн хэргээр 10 сая воны торгууль, 1 жил хүртэл хорих ял төлөвлөөд байгаа билээ. Одоогийн байдлаар И Гун цагдаагийн газарт хэд хэдэн байцаалт өгөөд байгаа юм.

И Гун өчигдөр (2022.06.27) AFP агентлагт өгсөн ярилцлагын хэсгийг юүтүүб хуудсандаа оруулсан.
 

Ярилцлагадаа тэрээр “Усанд орохыг хориглосон тэмдэг хадсан байлаа гээд тэнд живж байгаа хүнийг аврахгүй бол гэмт хэрэг. Би Сомали, Иракт жинхэнэ дайнд оролцож байсан туршлагатай, ур чадвартай цэрэг эр. Украинд очиж, гэмгүй хүмүүсийг аврахыг хүссэн. БНСУ-ын Паспортын тухай хуулийг зөрчсөнөө би “Замын хөдөлгөөний дүрэм” зөрчсөн хэрэг гэж л үзэж байгаа” гэж хэлсэн байна.

Хариуд нь AFP агентлагийн сэтгүүлч түүнийг БНСУ-ын Шүүхээс шоронд хорихгүй байх гэдэгт итгэж байгаагаа илэрхийлжээ.
 

И Гун “Үнэндээ солонгос цэргүүдийн ур чадвар маш өндөр. Манай Засгийн газар Украинд цэргийн тусламж ч үзүүлж болох байсан. Би Украинд Чех буу барьж, Канад цэргийн хүнс хэрэглэж байлаа. Тэнд Америк, Германы зэвсэг, пуужин бий. Би Өмнөд Солонгосын шөнийн дуран авч явах гэсэн боловч зөвшөөрөөгүй. Багийн хамт олноо одоо эсэн мэнд байгаа эсэхийг мэдэхгүй ч маш олон анд нөхрөө тулааны талбарт би алдсан. Амиа алдсан нөхдийнхөө тухай ном бичнэ” гэж ярьжээ.