Спортын салбарыг нэгдсэн бодлогын баримт бичигтэй болгоно

"Биеийн тамир, спортын хөгжилд төрийн бус байгууллагын оролцоо" сэдэвт уулзалт, хэлэлцүүлэг боллоо.

Хэлэлцүүлэгт ЗГХЭГ-ын дарга Д.Амарбаясгалан нарын албаны төлөөлөл МҮОХ, Биеийн тамир, спортын улсын хороо тэргүүтэй спортын холбоодын удирдлагууд оролцлоо.

ЗГХЭГ-ын дарга Д.Амарбаясгалан "Алсын хараа-2050", Засгийн газрын 2020-2024 оны үйл ажиллагааны хөтөлбөр зэрэг бодлогын баримт бичигт тусгасан нийтийн биеийн тамирыг хөгжүүлэх, иргэд эрүүл чийрэг амьдрах боломж нөхцөлийг бүрдүүлэх, үндэсний спортыг олон улсын түвшинд гаргах зэрэг зорилтуудыг хэрэгжүүлэхэд Үндэсний хорооны зүгээс онцгой анхаарч ажиллах хэрэгтэйг онцоллоо.

Эдийн засгийн нөхцөл байдал амаргүй байгаа ч “Парис-2024" зуны олимп, "Милан-Кортина-2026" өвлийн олимп ойртож буй энэ үед баг тамирчдын бэлтгэлийг хангах, Сангийн яамтай хамтран 2023 оны төсвийн төсөлд шаардлагатай хөрөнгийг тусгуулах хэрэгтэй. Мөн спортын салбар дахь допингийн асуудлыг цэгцлэхийн тулд дүрэм журмыг шинэчилж, бодлогын түвшинд анхаарч ажиллахыг салбарын сайд болон спортын мэргэжлийн холбоодын удирдлагад чиглэл болгов. Түүнчлэн спортын салбарыг нэгдсэн бодлогын баримт бичигтэй болгож, төрөөс хамааралгүйгээр бие даан хөгжих боломжийг бүрдүүлнэ" гэлээ.

Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ “Спортын салбар дахь допингийн асуудал, шударга бус байдлыг яаралтай таслан зогсоох шаардлагатай. Мэргэжлийн холбоод, тамирчид өөрсдөөсөө эхлэн үлгэрлэх, спортын ёс зүй, эв нэгдлээ дээшлүүлэх хэрэгтэй” гэв.

Харин ХЗДХ-ийн сайд, Монголын боксын холбооны ерөнхийлөгч Х.Нямбаатар "Нэг спортын төрлөөр олон холбоодтой, хоорондоо зөрчилдөөнтэй байдлыг цэгцлэх үүднээс “Нэгдсэн мэргэжлийн холбооны эрхзүйн байдлын тухай, Холбооны эрх зүйн байдлын тухай хууль зэрэг гурван ч хуулийн төслийг УИХ-аар хэлэлцүүлэх зэргээр ажиллаж байна" хэмээн спортын салбарын хууль, эрхзүйн орчны талаар танилцууллаа.