Алла Пугачева эргэж ирээд Киркоровыг хашраана

ОХУ-ын домогт дуучин Алла Пугачева Украины дайн эхэлсний дараа нөхөр хүүхдийн хамт Израильд амьдарч байгаа билээ. Түүний нөхөр Максим Галкин Оросын Засгийн газрыг ил тод шүүмжилсэн юм. Энэ цагаас хойш цагтаа Бурхан мэт байсан Аллаг Оросын хэвлэлээр урвагч хэмээн шүүмжилдэг, дайрдаг хүн олон болсон билээ.

Алдарт дуучны стилист байсан Жорж Ровалс Prozvezd-д ярилцлага өгөхдөө Аллаг эх орноосоо урваагүй, Орост эргэж ирнэ гэж ярьжээ.

Жорж “Би одоо ч Аллатай холбоотой байдаг. Хэзээ Орост харих вэ гэхээр битгий яаруулаад бай гэж хэлдэг юм. Тэр эх орноо худалдаагүй. Заавал эргэж ирнэ. Алла тайзгүй амьдарч чадахгүй. Тийм болохоор л гадаадад байгаа орос дуучдын тоглолтыг байнга үздэг, тэдэнд тусалдаг. Пугачева өөрийг нь Орост шүүмжилж байгаад их эмзэглэдэг. Урьд өмнө туслаж, дэмжиж, алдар хүндийн тавцанд гаргасан жүжигчин, дуучдын зарим нь нүүрээ буруулсанд дургүйцдэг. Киркоров зэрэг өөрсдийгөө од гэж боддог дуучид өмнө нь Аллагийн өлмийг үнсээд, долигноод гүйдэг байлаа. Харин одоо тэд Аллаг хамгаалахаас айж байна. Түүнийг байхгүйд лидер болох бодолтой. Алла угаасаа нэг номер байсан, цаашдаа хамгийн шилдэг нь хэвээр байх болно. Удахгүй тэр эргэж ирээд тэр дуучдыг хашрааж, байранд нь эргүүлэн тавих болно” гэж хэлсэн байна.