Карловын их сургуульд гал нээж, 14 хүн амиа алдав

Чехийн Карловын их сургуульд буутай этгээд гал нээсний улмаас 14 хүн амиа алдаж, 25 хүн шархаджээ. Есөн хүний биеийн байдал туйлын хүнд байна.

Хэрэг гарсан өдөр гэмт этгээдийн эцэг нь амиа алдсан байдалтай олдсон бол гэмт этгээд өөрөө мөн амиа алджээ. Чехийн цагдаагийн газар гэмт этгээд амиа хорлосон байж болзошгүй гэж үзэж байгаа бол эрх баригчид түүнийг цагдаа нарт буудуулсан гэх хувилбарыг мөн шалгаж байна.

Гэмт этгээд их сургуулийн оюутан /24 настай/ байжээ. Түүний цогцсыг их сургуулийн дэргэд олжээ. Тэр юуны учир ийм хэрэг үйлдсэн нь одоогоор тодорхойгүй байгаа ч хууль хүчнийхэн түүнийг бусад улсад гарсан ижил төрлийн хэргээс санаа авсан байж магадгүй гэж үзэж байна. Мөн түүнийг өнгөрсөн долоо хоногт Прага хот орчмын ойгоос цогцсууд нь олдсон эрэгтэй хүний болон бяцхан охины амийг хөнөөсөн хэрэгтэй холбоотой байж магадгүй гэж үзэж байна.

Хэвлэлд “Давид К” гэж нэрлэж буй гэмт этгээд Карловын их сургуулийн Дэлхийн түүхийн дээд сургуулийн философийн ангид сурч байжээ. Тэр зэвсэг эзэмших эрхтэй байсан гэж цагдаагийн газраас мэдээлжээ. Тэрээр Прага хотын төв талбайн дэргэд байрлах их сургуулийн байранд лекцтэй байжээ. Хэрэг гарахаас нэг цагийн өмнө цагдаа нар түүнийг хайж сургуульд нь очсон байна. Үүнээс өмнө Прага хотын ойролцоох тосгонд түүний эцэг нас барсан байдалтай олдсон тул цагдаа нарт түүнийг амиа хорлож магадгүй гэсэн мэдээлэл иржээ.

Карловын их сургууль нь 1348 онд байгуулагджээ. Их сургуульд 50 мянга гаруй оюутан суралцдаг байна.