Швейцарчууд хүн амаа 10 саяар хязгаарлахыг дэмжиж байна

Швейцарын иргэдийн 50 орчим хувь нь Швейцарын ардын намаас дэвшүүлсэн тус улсын хүн амыг 10 саяар хязгаарлах тухай саналыг дэмжиж байна. Санал асуулгыг Minuten сонин болон Tamedia медиа холдингийн захиалгаар LeeWas судалгааны хүрээлэн явуулжээ.

Швейцарын хүн амын хурдацтай өсөлт олон жилийн турш яригдаж байна. Үүнтэй холбогдуулан Швейцарын ардын намаас гарсан парламентын гишүүд 2050 он хүртэлх байнгын оршин суугч хүн амын дээд хэмжээг 10 саяар хязгаарлаж, Үндсэн хуульдаа заах санаачилга гаргасан байна. Энэ асуудлаарх бүх нийтийн санал асуулгыг 2026 оны зургаадугаар сард явуулахаар зэхэж байна. Хэрэв энэхүү санаачилга дэмжигдвэл Швейцарын эрх баригчдад цагаачлалын бодлогоо чангатгахаас өөр аргагүйд хүрнэ.

2024 оны есдүгээр сарын байдлаар, тус улсын хүн ам түүхэндээ анх удаа 9 саяыг давжээ. Үүнд цагаачдын тоо ороогүй байна.