Financial times: Азийн хамгийн баян Монгол улс Беларусь, Гректэй адил үнэлэгдэж байгааг гайхаж байна

Байгалийн баялаг маань манай улсын нэр хүндэд эерэгээр нөлөөлөөд эхэлчихжээ. Дэлхийд хүлээн зөвшөөрөгдсөн эдийн засагчид Монгол Улсын байр суурийг Беларусь, Гректэй зэрэгцэж байгаад гайхаж байна.

“Уул уурхайн баялгаараа хүн бүхний шуналыг хөдөлгөж байгаа Монгол Улс зээлжих зэрэглэл, бас бус үзүүлэлтээр яахаараа Беларусь, Гректэй адил түвшинд хамаарагддаг байна” гэсэн утгатай мэдээлэл Financial times сайтад тавигдсан байна.

Уг материалд “Азийн хамгийн баян улсын нэг болох бүрэн боломжтой Монгол Улс зээлжих эрхийн хувьд Европоос таслагдаад байгаа Беларусь, дампуурлаа зарлах шахсан Гректэй нэг зиндаанд үнэлэгдэж байгаа нь гайхмаар юм. Монгол үнэхээр Беларусиас илүү эрсдэлтэй улс гэж үү. Гэхдээ ганц эрсдэлтэй тал байгаа нь ашиг орлого нь хэтэрхий эрсэлтэй байдаг явдал. ДНБ-ий ихэнх хувь нь байгалийн баялаг байдаг учир үнэт металл, түүхий эдийн дэлхийн зах зээлийн ханш унаж гэмээ нь бүх зүйл нуран унах аюултай. Байгалиас хараат байдаг нь монголчуудын бас нэг зовлон. Зуд болж гэмээ нь эдийн засаг нь бас л уналтад орно. Үндэсний мөнгөн тэмдэгтийнх нь ханш үүнээс болоод маш тогтворгүй байдаг…”. “Гэхдээ улс төрийн үйл явцад ухаалаг ханддаг байдал, түүхий эдийн үнийн өсөлт зэрэг эерэг тал нь дээр дурьдсан сөрөг талуудаас илүү жин дарж байгаа юм. Социалист системд байгаад “сохор зоосны ч гарлагагүй” ардчиллын замд шилжсэн энэ улсын эдийн засаг хурдтай өсөх боломжтой. Байдал энэ янзаараа үргэлжлэх юм бол Монгол Улсын зээлжих эрхийн зэрэглэлийг дээшлүүлэх талаар ярих хэрэгтэй болно” гэх зэргээр бичжээ.   

Б.Хурцболд