Алтны худалдан авалтын талаар төрийн байгууллага, аж ахуйн нэгж хооронд уулзалт зохион байгуулав

Монголбанкинд алтны салбарт хэрэгжиж буй бодлого, үйл ажиллагаа түүний хэрэгжилт мөн тулгамдаж буй асуудлын талаар хэлэлцүүлэг уулзалт болов. Уулзалтад Уул уурхай, хүнд үйлдвэрийн яам, Ашигт малтмал газрын тосны газар, Үнэт металлын сорьцын хяналтын газар, Швейцарын хөгжлийн агентлагийн Тогтвортой бичил уурхай төсөл, Алт үйлдвэрлэгчдийн холбоо, Арилжааны банкны төлөөлөл оролцлоо.

Тус уулзалтын эхэнд Монголбанкны дэд Ерөнхийлөгч Б.Лхагвасүрэн Монголбанкнаас санаачлан хэрэгжүүлж эхлээд буй “Эх орныхоо алтыг Эрдэнэсийн сандаа” аяны хүрээнд хийх үйл ажиллагааны талаар танилцуулж, аяны хүрээнд хамтран ажиллах төрийн болон хувийн хэвшлийн байгууллагуудтай хэрхэн хамтарч ажиллах, аяны хүрээнд тулгамдаж буй асуудлуудаа шийдвэрлэх боломжийн талаар оролцогчдын саналыг сонслоо.

Таван сарын хугацаанд хэрэгжих аяны хугацаанд Үнэт металлын сорьцын лабораторийг Баянхонгор, Дархан-Уул аймагт байгуулж, алт худалдан авах үйл ажиллагааг өргөжүүлэх, Монгол Улсын хилээр алтыг хууль бусаар нэвтрүүлэх гэмт хэргийн нөлөөллийг бууруулахад тууштай ажиллах, хариуцлагатай уул уурхайг дэмжиж, төрийн болон төрийн бус байгууллагын уялдаа холбоог сайжруулах, Үнэт металлын сорьцын хяналтын газраас алтны сорьцыг онлайн горимд хүлээн авах, алтны олборлолт, сорьц тогтоолт, үнэ ханшийн тооцооллын талаарх мэдээллийг иргэдэд хүргэж ажиллахаар тус тус зорьж буй талаар Монголбанкны Дэд Ерөнхийлөгч мэдээлэлдээ танилцуулсан юм.

Уулзалтын үеэр Монголбанкны Эрдэнэсийн сангаас Монголбанкны алт худалдан авах үйл ажиллагааг боловсронгуй болгоход чиглэсэн хэд хэдэн санаачлагыг дэвшүүлж буй тухай танилцууллаа. Тухайлбал,  алтны гарал үүслийг тодорхой болгох тал дээр холбогдох төрийн байгууллагуудтай хамтран ажиллаж, хууль эрх зүйн баримт бичгийг боловсруулах, эко алтыг худалдан авч экспортлох боломжийг турших, цаашид хэрхэн ажиллах талаар судлах, алт олборлогч, худалдан авагчийн нэгдсэн платформ програм хангамжийг Ашигт малтмал, газрын тосны газар болон холбогдох төрийн байгууллагуудтай хамтран судлан боловсруулах, Үнэт металлын сорьцын хяналтын газраас алтны сорьцын шинжилгээний бичгийг онлайн горимд хүлээн авах гэх зэрэг болно.

Түүнчлэн арилжааны банкуудын зүгээс алтны худалдан авалтад идэвхтэй оролцохоор шинэ санаачлагууд дэвшүүлэн ажиллаж байгаа тухай мэдээлэл өгсөн ба Голомт банк Монголынхоо алтыг Монголдоо үлдээхийг уриалж,  алтны албан арилжааг идэвхжүүлэхийн тулд алтны хоёрдогч зах зээлийг хөгжүүлэх санал дэвшүүлж буйгаа танилцууллаа. 

Уулзалтад тавигдсан санал хүсэлт, санаачлагыг хэлэлцүүлж, аяны үйл ажиллагаанд тусгах төдийгүй бодлогын шийдвэр гаргалтад санал оруулж ажиллах юм.