Нийслэлд 135 хүүхэд, 10 жирэмсэн эмэгтэй халдвар авчээ

Эрүүл мэндийн яамнаас коронавируст халдварын нөхцөл байдлын талаар өнөөдрийн мэдээллийг өглөө./2021.07.26/

Сүүлийн 24 цагт 1,249 шинэ тохиолдол бүртгэгдэж, 2,014 иргэн эдгэрчээ. Бүртгэгдсэн тохиолдлуудын 504 нь Улаанбаатар хотод, 745 нь орон нутагт батлагдсан байна.

Нийслэлд батлагдсан тохиолдлуудаас 135 нь хүүхэд,  10 нь жирэмсэн эмэгтэйчүүд байна. Өнөөдрийн байдлаар 2,332 хүүхэд, 175 жирэммсэн эх  эмнэлэгт хэвтэн эмчлүүлж буй аж.

Монгол Улсын хэмжээнд ковидын халдвар авсан нийт хүүхдийн тоо 34,308 болсон бол уг вирусээр өвчилсөн жирэмсэн эмэгтэйчүүдийн тоо 2,762 боллоо.

Ковидын нийт батлагдсан тохиолдол 157,974 болсон бол нийт нас баралт 782 болжээ.

Өнгөрсөн 24 цагт 8 иргэн нас барсан харамсалтай мэдээллийг Эрүүл мэндийн яамнаас өгсөн.  Хүйсээр авч үзвэл 6 эмэгтэй, 2 эрэгтэй байна. Эдгээр иргэдийн 5 нь ковидын шалтгаанаар нас барсан бол 3 нь архаг хууч өвчин ковидтой хавсарсан гэсэн юм.