Ухаалаг утасны зай хурдан илэгдэхэд хүргэдэг хүчин зүйлс

Ухаалаг утасны аккумлятор дунджаар гурван жилийн ашиглалтын хугацаатай байдаг ч хурдан илэгдэхэд хүргэдэг хэд хэдэн хүчин зүйл байдаг байна. Үүний нэг нь вибраторын горим гэж мэргэжилтнүүд онцолжээ. Чичиргээний горимыг байнга идэвхжүүлснээр ухаалаг утас бүрэн хүчин чадлаар ажилладаг тул зай хурдан илэгдэж, цэнэгээ барихаа больдог байна.

Үүнээс гадна ашигладаггүй аппликэйшнуудыг байнга нээлттэй байлгах нь цэнэгийг хурдан дуусгадаг байна. Мөн байршил тогтоох аппликэйшныг ажиллуулахад ухаалаг утас багагүй эрчим хүч зарцуулдаг.

Дэлгэцийн гэрэл хэт хурц байх нь утасны цэнэгийг хурдан дуусгадаг бол утсаа ойр ойрхон цэнэглэх нь аккумляторын ашиглалтын хугацааг богиносгодог байна. Утсаа хэт халуун эсвэл хэт хүйтэн орчин байлгах нь утсанд төдийгүй хэрэглэгчийн эрүүл мэндэд сөрөг нөлөөтэй гэнэ. Ухаалаг утасны цэнэг огцом унах, утас өөрөө унтарч, асах, корпус нь халах, хөөх, гацах зэрэг нь аккумлятор ашиглалтаас гарч байгаагийн дохио.