Шинзо Абэг гар хийцийн буугаар БУУДЖЭЭ

Японы Ерөнхий сайд асан Шинзо Абэг Нара хотод сонгуулийн сурталчилгааны ажилд оролцон, үг хэлж байхад нь үл мэдэгдэх этгээд гар хийцийн галт зэвсэг ашиглан буудаж, шархдуулаад байна. Эх сурвалжуудын мэдээлснээр гар хийцийн бууг гэмт этгээд өөрөө угсарчээ.  

Абэгийн биед халдсан этгээд нь Нара хотын харьяат Ямагами Тэцүя хэмээх нэгэн. Японы Тэнгисийн цэргийн хүчинд алба хашиж байсан тэрээр анхны мэдүүлгээ өгсөн байна.  

Гэмт этгээд "Би Абэгийн бодлогод сэтгэл хангалуун биш байсан, түүнийг хөнөөхийг хүсэж байсан" хэмээн мэдүүлсэн бөгөөд түүнийг үргэлжлүүлэн шалгаж байгаа тухай холбогдох албаныхан мэдээлжээ. 

Абэгийн эсрэг халдлага орон нутгийн цагаар өнөөдөр (2022.07.08) 11:30 орчимд болсон юм. Гэрчүүдийн ярьснаар, буун дуу хоёр удаа гарсан бөгөөд Абэ хоёр дахь буудлагын дараа газарт унажээ. Гэмт этгээд түүнийг араас нь буудсан байна.

Зарим эх сурвалж Абэг тээвэрлэх явцад биеийн байдал нь муудаж, түүний зүрх, уушгины үйл ажиллагаа зогссон хэмээн мэдээлж байна.