Сурагчдыг хордуулсан "Амьсгал боогдуулагч"-ыг халдлагад өртөж байсан хүүхдээс булаажээ

Дархан-Уул аймгийн "Оюуны ирээдүй" цогцолбор сургуулийн төгсөх ангийн хоёр сурагч "Амьсгал боогдуулах, нулимс асгаруулагч" хийг сургуулийнхаа нэгдүгээр давхарт цацсанаас болж, өнөөдөр /2022.11.08/ 60 хүүхэд яаралтай тусламж авч, одоогоор 30 гаруй хүүхэд, том хүнийг аймгийн Нэгдсэн эмнэлэгт эмчилж байна.

Сургуульд тавьсан камерын хяналтаар тухайн хэрэгт холбогдолтой сурагчдыг олж тогтоосон бөгөөд тэд "Амьсгал боогдуулагч" цацлагыг сургуулийнхаа нэгэн хүүхдээс булааж авсны дараа коридорт цацаж үзсэн гэнэ.

Тус цацлагийг хэрэглэхээр авч явсан хүүхэд нь өмнө нь халдлагад өртөж байсан тухай Дархан-Уул аймгаас УИХ-д сонгогдсон гишүүн Г.Дамдинням хэвлэлд ярьжээ.

Тэрбээр "Өмнө нь халдлагад өртөж байсан хүүхдийг биеэ хамгаал гэж эцэг, эх нь амьсгал боогдуулагч авч өгсөн гэх мэдээлэл байна" гэж олон нийтэд мэдээллээ. 

Биеэ хамгаалахад зориулагдсан энэхүү бодисыг худалдан борлуулахыг хориглоогүй ч авсан тохиолдолд яаж хадгалж, хэрэглэх ёстой вэ гэх зөвлөмжийг гаргах, сургуулийн орчин, анги танхимд авч орохгүй байхад онцгой анхаарал хэрэгтэй болсныг эцэг, эх асран хамгаалагчид шүүмжилж байна.