Леброн Жеймс ерөнхийлөгчийн сонгуульд Камала Харрисыг дэмжиж байна

НБА-ын супер од Леброн Жеймс пүрэв гаригт дэд ерөнхийлөгч Камала Харрисыг дэмжиж буйгаа илэрхийлжээ.

Ерөнхийлөгч асан Доналд Трампын доромжилсон үг хэллэг бүхий бичлэгийг “Х” платформ дээр хуваалцахдаа “Юу ч ярих вэ дээ? Хүүхдүүд, гэр бүлээ, тэдний ирээдүйг бодохоор сонголт маш тодорхой. САНАЛАА КАМАЛА ХАРРИСД!!! ” гэж бичжээ. Уг бичлэгт Трампын “Харрис ерөнхийлөгчөөр сонгогдвол улс орон минь Детройт шиг гундана , Хууль бус цагаачид улсын минь цусыг бохирдуулж байна” гэх зэрэг өнгөрсөн хугацаанд хэлж байсан доромж үгнүүдийг эвлүүлсэн байна.

Жеймсийн постыг Бейонсе, Тейлор Свифт, Бад Банни, Арнольд Шварцнеггер зэрэг алдартнууд дэмжжээ. Леброн өмнө нь ч Трампыг төрийн эрх барьж байхад ч шүүмжилдэг байсан юм.

Х.Энхболд