Ши, Трамп нарын уулзалтын өмнө худалдааны гэрээний хүрээг тохиролцов

АНУ, БНХАУ хоёр худалдааны гэрээний хүрээний талаар тохиролцоонд хүрчээ. Төслийг тус хоёр улсын тэргүүн нар энэ долоо хоногт болох дээд хэмжээний уулзалтаар хэлэлцэнэ гэж АНУ-ын сангийн сайд Скотт Бессент мэдэгджээ.

Хэлцэлд TikTok сүлжээний Америкийн талын оролцооны тухай эцсийн тохиролцоо болон Хятадын газрын ховор металлын экспортын хяналтыг чангатгах арга хэмжээг хойшлуулах тухай асуудлуудыг тусгажээ. АНУ-ын ерөнхийлөгч Доналд Трамп, БНХАУ-ын дарга Ши Жиньпин нар БНСУ-д ирэх пүрэв гарагт уулзах товтой. Бессент Хятадын талтай Малайз улсад болж буй АСЕАН-ы дээд хэмжээний уулзалтын хүрээнд уулзалт хийсэн байна.

Бээжин эл уулзалтыг үр дүнтэй болсныг онцолж талуудын сонирхсон асуудлуудыг шийдвэрлэх чиглэлд үндсэн зөвшилцөлд хүрсэн гэж мэдэгджээ.