Их Британи өсвөр настнуудад нийгмийн сүлжээ ашиглахыг хориглож магадгүй

Их Британийн засгийн газар хүүхэд, өсвөр настнуудын нийгмийн сүлжээний хэрэглээг хязгаарлах, сургуулийн орчин ухаалаг утасны хэрэглээг хориглосон хоригийн хяналтыг чангатгах асуудлаар зөвлөгөөн явуулахаар болжээ. Ингэснээр хүүхэд, залуусын интернэт орчин дахь аюулгүй байдлыг хангах зорилготой.

Их Британийн эрх баригчид нийгмийн сүлжээг ашиглахыг зөвшөөрсөн насны доод хязгаарыг тодорхойлохын сацуу энэ төрлийн хязгаарлалтын арга хэмжээ авсан улс орнуудын туршлагыг судлах аж.

Тус улс Grok хиймэл оюун ухааны ашиглан насанд хүрэгчдэд зориулсан зураг бүтээдэг чатботтой холбоотойгоор Х сүлжээний эсрэг арга хэмжээ авч магадгүй гэсэн мэдээлэл энэ сарын 10-нд гарсан билээ. Блүмберг агентлагаас энэ сарын 3-нд мэдээлснээр, xAI компанийн Grok хиймэл оюуны загвар хэрэглэгчдийн хүсэлтээр насанд хүрэгчдэд зориулсан контент бүтээж, Х сүлжээн дэх пэйж дээрээ байршуулж байжээ.