Месси ДАШТ-ий бүх цаг үеийн "МЭРГЭН БУУЧ" боллоо

Ц.Энхтүвшин I Таван цагариг сонин
Гэрэл зургийг Ganbat Chuluunbaatar
Монголын Спортын Сэтгүүлчдийн Холбоо - MSPA
 

-Миний үзсэн Мессигийн ДАШТ-ий тоглолтууд-
 

Дэлхийн аварга, ДАШТ-ий хамгийн олон тоглолтод оролцсон (28 тоглолт) амжилт дээрээ Аргентиний ахлагч Лионель Месси ДАШТ-д хамгийн олон гоол оруулсан (18 гоол) амжилтыг шинэчиллээ.

Өнөөдөр Даллас хотноо Австрийн эсрэг тоглоход Месси дэлхийн аваргын 17, 18 дахь гоолоо оруулж, энэ жагсаалтыг ганцаараа манлайлж эхэллээ.

Месси энэ жил зургаа дахь ДАШТ-дээ тоглож буй. Миний бие Аргентиний аугаа одыг дөрвөн ДАШТ дараалан үзэж байна.

Анх 2014 онд Бразилд болсон ДАШТ-ий үеэр Белу Оризонте хотноо ангийн найз Ж.Одхүүгийнхээ хамтаар Аргентин-Ираны тоглолтод харж байв. Ирантай хийсэн тоглолтын сүүлийн минутад Месси хожлын гоолыг оруулж байсан.

2018 онд ОХУ-д болсон ДАШТ-ий үеэр Месси Исландтай тэнцэхэд " пенальти" алдсаныг, Хорватад Нижний Новгород хотноо 0:3-ээр бут ниргүүлэхэд хамт байлаа, цэнгэлдэхэд.

2022 оны Катарт болсон ДАШТ-д Саудын Арабад эхний тоглолтод хожигдсоноос эхлээд Дэлхийн аваргын алтан цомыг өргөхийг нь ч дэргэдээс нь харж байв.

Харин энэ удаа ДАШТ-ий бас нэгэн түүхэн рекордын эзэн болж, 18 дахь гоолоо оруулахыг харлаа, хосгүй, ховорхон түүхийн гэрч боллоо.

Мессигийн дэлхийн аваргын ногоон талбайд оруулсан энэ 18 гоолын наймыг нь яг дэргэдээс харсан юм байна, одоо бодоход.

Түүхийн гэрч болж, түүнийг тэмдэглэн үлдээнэ гэдэг чинь ер бусыг гайхалтай хувь тохиол билээ л.