Буриад айлд өргүүлсэн монгол залуу 28 жил паспортгүй байна

Энэ залууг Доржи Тапхаров гэдэг. Буриадад амьдардаг монгол залуу. 28 настай ч одоо болтол паспортгүй, нэг үгээр хэлэхэд иргэншилгүй.

1996 онд түүнийг дөрвөн настай байхад нь аав, ээж нь Буриад айлд өргүүлжээ. Олон хүүхэдтэй айл хүүхэдгүй буриад хосод бага хүүгээ өргүүлж, Монголын хуучны заншил ёсоор идээ будаа ч засжээ. Гэвч өргөж авсан аав, ээж хоёр нь түүнийг төрсний гэрчилгээгээс өөр бичиг баримтгүй Монголоос аваад ирсэн нь хүнд сурталтай Орос оронд Доржиг тун хэцүү байдалд оруулаад байгаа юм.

Энэ талаараа Доржи “Ариг Ус” телевизэд “Манай ээж монгол ээжид хандан, бичиг баримт хөөцөлдүүлэхээр төрсний гэрчилгээ өгөөд явуултал гээчихсэн гэсэн. Одоо надад хуулбар нь л байдаг. 2005 онд ээж Монголын Консулын газарт өргөдөл гаргасан, жинхэнэ ээж маань ч намайг ОХУ-ын иргэншил авахад татгалзах зүйлгүй гэсэн бичиг хийж өгсөн. Гэвч Консулын газраас хариу одоо болтол байхгүй. Жил болгон консул нь өөрчлөгддөг. Одоо ч мөн адил. Энэ хооронд Монголд байсан аав, ээж хоёр минь нас барсан. Намайг 14 настай байхад аав, ээж хоёр “Чи бидний хүү биш. Бидэнтэй хамт амьдрах уу, Монголдоо харих уу гэж хэлж байлаа. Би мэдээж “Та нар миний эцэг эх, эндээ амьдарна гэж хариулсан” гэж ярьж байна.

Харин ээж нь түүнийг бүртгүүлж, өв залгамжлагчаа болгож чадаагүй тул байрыг нь буриад ээжийнх нь холын хамаатнууд авчихсан гэнэ. Одоо Доржи байр түрээслэн, барилгачин, заримдаа ачигчийн ажил хийж, амиа зогоож байна.

Буриадын Иргэний бүртгэлийн газрын хэлтсийн дарга Татьяна Мыльникова “Одоогийн байдлаар түр зуур оршин суух эрх л өгөх арга байна. Харин Монголоос бүх бичиг баримтаа авах юм бол түүний хууль ёсны эрхийг баталгаажуулна” гэж тус телевизийн сэтгүүлчид хэлжээ.