Колумб цагаачид бүхий АНУ-ын онгоцыг буцаасан ч дахин хүлээн авахаар болжээ

Колумб улс АНУ-аас албадан гаргасан 160 орчим хууль бус цагаачдыг тээвэрлэж явсан АНУ-ын цэргийн нисэх онгоцыг хүлээн авахаас татгалзсан тухай Ройтерс агентлаг мэдээлсэн.

Колумбын Ерөнхийлөгч Густаво Петро Вашингтонд хандан, албадан гаргаж буй хүмүүстэй зүй ёсоор харьцахыг уриалж байв. Үүний хариуд АНУ-ын Ерөнхийлөгч Доналд Трамп тус улсын эсрэг визийн болон санхүүгийн хориг тавьж, Колумбын бараа бүтээгдэхүүнд 25 хувийн татвар ногдуулна гэж мэдэгдсэн.

Хожим нь Цагаан ордноос Колумбын Засгийн газар Вашингтоноос тавьсан нөхцөлийг хүлээн авсан тухай мэдээлжээ. Тухайлбал, АНУ-аас албадан гаргаж буй Колумбын иргэдийг хүлээн авахаар болсон байна.