Улаанбаатар-Москва чиглэлийн нислэгийг сэргээх хэлэлцээ үргэлжилж байна

Улаанбаатар-Москва чиглэлийн шууд нислэгийг сэргээх тухай яриа хэлэлцээг талууд явуулж байна гэж РИА Новости мэдээлжээ. Хэлэлцээний үеэр Буриад руу нислэг үйлдэх асуудлыг мөн хөндөж байна гэж ОХУ-ын эдийн засгийн хөгжлийн яамны олон талт эдийн засгийн хамтын ажиллагааны газрын дарга Никита Кондратьев мэдэгджээ.

Хоёр талын шууд нислэгийг сэргээх яриа хэлэлцээг Монголын талтай явуулж байна. Зөвхөн Москва төдийгүй Оросын бүс нутаг, тэр дундаа Буриад руу шууд нислэг эхлүүлэх сонирхол байна гэж Кондратьев онцолсон байна.

Одоогийн байдлаар, Орос, Монголын хоорондын нислэгийг Оросын тээвэрлэгч компаниуд Эрхүү, Красноярск хотуудаас гүйцэтгэж байна. Өнгөрсөн оны зургаадугаар сард Росавиация компанийн дэд тэргүүн Алексей Буевич хоёр улсын хооронд жуулчдын урсгал эрчимтэй нэмэгдэж буйг мэдэгдэж байсан билээ. Агаарын тээврийн хөгжил нь хоёр улсын хамтын ажиллагааг бэхжүүлэхэд чухал гэдгийг Буевич онцлоод нислэгийн чиглэлүүдийг өргөжүүлэх нь хоёр улсын иргэд хоорондын харилцаанд чухал ач холбогдолтой болохыг онцлон тэмдэглэсэн байна.