Францын Тотал компани манайд шатдаг занарын хайгуул хийх хүсэлт тавьжээ

Манай улсад шатдаг занар эрэх, хайх, олборлох, боловсруулах, ашиглах асуудлыг судлан, нийлэг газрын тос, хийн үйлдвэрлэлийн цогцолбор байгуулах, эрх зүйн орчинг болосвронгуй болгох, “Шатдаг занар” бодлого, хөтөлбөрийн төсөл боловсруулахаар ажиллаж байгааг салбарын яамнаас мэдэгдэж байна. Манай улсын нутаг дэвсгэр дэх занарын тархацыг судлан үзэж, шатдаг занараас нийлэг хийн конденсат гарган авах боломжийг тодорхойлж, занарыг байгаль орчинд хоргүй аргаар газрын гүнд нь боловсруулж газрын тосны бүтээгдэхүүн (бензин, дизель болон онгоцны түлш, шатдаг хий зэрэг) үйлдвэрлэх технологийг нутагшуулах боломжийг судлах аж.

Өнгөрөгч оны 6 дугаар сард Эрдэс баялаг, эрчим хүчний яамнаас (хуучин нэрээр) АНУ-ын “Жени Ойл энд Газ” компанитай “Шатдаг занараас хийн конденсат гаргах боломжийг тодорхойлох судалгааны ажлын гэрээ” байгуулсан байдаг. Дээрх компаниас гадна Франц улсын Тотал компани Монгол улсад шатдаг занарын хайгуул, судалгааны ажил хийх боломжтой талаар саналаа илэрхийлээд байгаа аж. Мөн Монголын Алт ХХК, Нарантуул трейд ХХК зэрэг дотоодын хэд хэдэн аж ахуйн нэгж шатдаг занартай холбоотой асуудлаар судалгааны ажил явуулж эхлээд байгаа юм байна.