“Оюу толгой”-н баяжмалын тээвэрлэлтийг хайрган замаар хийхийг зөвшөөрчээ

“Оюу толгой” ХХК-ийн баяжуулах үйлдвэр ашиглалтад орсноор, бүтээгдэхүүнээ энэ оны 6 дугаар сард экспортод гаргахаар төлөвлөж байна. Оюу толгой компанийн баяжмалыг төлөвлөсөн цаг хугацаанд нь экспортлох боломжийг бүрдүүлэхийн тулд төслийн бүтээн байгуулалтыг эрчимжүүлэх шийдвэр Засгийн газрын хуралдаанаас гарсан.

Төслийн бүтээн байгуулалтад шаардлагатай газар олголт, газар эзэмшүүлэх, ашиглах эрх, Оюу толгой-Гашуун сухайт чиглэлийн автозам, гадаад ажиллах хүчний хөдөлмөр эрхлэх зөвшөөрөл, баяжмалын гаалийн бүрдүүлэлт, байгаль орчин, ус, цахилгаан станц, хөндлөнгийн хяналтын лаборатори, дэд бүтцийн корридор зэрэг тулгамдсан асуудлыг шуурхай шийдвэрлэж ажиллахыг Уул уурхайн сайдад үүрэг болгосон байгаа.

Оюу толгой ХХК-ийн эзэмшлийн ашиглалтын тусгай зөвшөөрлийн талбайгаас гадна шинээр баригдах шаардлагатай 6 барилга байгууламжуудад газар эзэмших зөвшөөрөл олгох шаардлагатай байгаа. Үүний дагуу баяжмал ялгах, гаалийн хяналтын талбай (33.9 га) болон далд уурхайн 4-р босоо амны (12.72 га) газрын зөвшөөрлийг Ханбогд сумын дэд бүтцийн хөгжилд бодит хувь нэмэр оруулах нөхцөлтэйгээр олгохоор урьдчилсан байдлаар тохиролцсон байна.

Түүнчлэн ЗТЯ, "Оюу толгой" ХХК, "Эрдэнэс Оюу толгой" ХХК-ийн төлөөлөл хэлэлцэн доорхи шийдэлд урьдчилсан байдлаар хүрээд байна. Тухайлбал 2014 оны 1 дүгээр сарын 1-ний өдрийг хүртэл одоогийн сайжруулсан хайрган зам дээр дан чиргүүлтэйгээр баяжмалын экспортын тээвэрлэлт хийхийг ЗТЯ урьдчилсан байдлаар зөвшөөрсөн. Гэхдээ Цагаан хаднаас Гашуунсухайт хилийн боомт хүртэлх хэсэгт Энержи Ресурсын хатуу хучилттай замыг ашиглах юм.

Таван толгойн цахилгаан станцаас Оюу толгойн эрчим хүчний эх үүсвэр хангах, Оюу толгой" ХХК-ийг Таван толгойд баригдах цахилгаан станцын бүтээн байгуулалтад оролцуулах асуудлаар зөвлөлдөж байна.