“Монголын Алт”, “Эрдэнэт”-ийн төслүүдийг Германчууд дэмжжээ

Уул уурхайн яам 2009 оноос хойш жил бүр зохион байгуулагдаж буй Эрдэс баялгийн салбарт хамтран ажиллах Монгол Улсын Засгийн газар, Холбооны Бүгд Найрамдах Герман Улсын Засгийн газар хоорондын дэд ажлын хэсгийн дөрөвдүгээр хуралдааныг Улаанбаатар хотноо энэ сард зохион байгуулсан.

Ажлын хэсгийн зорилго нь холбогдох яамд, мэргэжлийн холбоод, компаниудын оролцоотойгоор уул уурхай, уул уурхайн тоног төхөөрөмжийн үйлдвэрлэл, эрдэс баялгийн салбар дахь хамтын ажиллагааны тусгайлсан төслүүдийг тодорхойлж, хамтран хэрэгжүүлэхэд оршидог.

Ээлжит хуралдаанаар МАК ХХК-иас Адуунчулууны нүүрс шингэрүүлэх төсөл, Эрдэнэт үйлдвэрээс “Цагаан тоос” төсөл, Багануур ХК-ниас Тоног төхөөрөмжийн шинэчлэлтийг үе шаттай хийх, Нүүрс баяжуулах үйлдвэр байгуулах, Конвейерийн системийг хөрс, нүүрсний тээвэрт нэвтрүүлэх цогц төслүүдийн талаар танилцуулж Германы тал хамтран хэрэгжүүлэх сонирхолоо илэрхийлсэн байна.