Өрсөлдөгч нь хурлаа тасалснаас болж засаг даргаа сонгосонгүй

Дундговь аймгийн ИТХ өнгөрсөн баасан гаригт хуралдах товтой байсан. Уг хурлаар аймгийн дараагийн Засаг даргыг томилохоос эхлээд олон асуудлыг хэлэлцэх байв. ИТХ нь 20 хоногийн өмнө хуралдахдаа өмнөх Засаг дарга С.Сүхбаатарыг хууль зөрчин ажилласан, хууль бус томилгоо хийхийн зэрэгцээ төрийн албан хаагчдыг хувийн өс хонзонгоор дарамталсан гэж үзэн огцруулаад байсан юм.

Ийн өнгөрсөн баасан гаригт Дундговь аймгийн ИТХ хуралдаж дараагийн Засаг даргаа сонгохоор товлоод байсан ч хурал нь тодорхойгүй шалтгаанаар хойшилжээ. Учир нь Засаг даргад МАН-аас нэр дэвшигч Ц.Ганхүү тухайн өдөр ИТХ-ын дарга С.Буджавыг машиндаа суулган хээр гарч зугтаажээ. Учир нь МАН-аас нэр дэвшигч Ц.Ганхүү ялагдал хүлээх өндөр магадлалтай байгаа аж. Тодруулбал, АН-аас нэр дэвшигч С.Од-Эрдэнийн дэмжлэг Ц.Ганхүүгээс илүү болсон аж. МАН-ынхан ИТХ-даа 17 гишүүнтэйгээр олонхийн суудлыг бүрдүүлж байгаа бол АН 15, МАН-аас АН-д шилжиж орсон хоёр, МҮАН-ын нэг гээд сөрөг хүчин нь өнөөдөр олонхиосоо олуулаа болсон юм байна. Тиймээс сөрөг хүчин хийгээд эрх баригчид тохироо хийж аймгаа хамтарч удирдахаар болсон байна. Суудал тэнцүү учраас МАН, АН-аас нэг, нэг хүнийг нэр дэвшүүлэн өрсөлдүүлэхээр болж ИТХ-ын товоо зарлаад байжээ. Гэтэл Ц.Ганхүү асуудал нөгөө талд шийдэгдэж магадгүйг ойлгож ийнхүү ИТХ-ын дарга С.Буджавыгаа суулган хээр гарч хурлаа тасалдуулсан аж. С.Од-Эрдэнэ нь олон жил Дундговь аймгийн АН-ыг удирдаж байгаа бол Ц.Ганхүү Ж.Наранцацралт агсны туслах байсан нэгэн. Тэрээр МАН-д ороод удаагүй бөгөөд С.Сүхбаатар Засаг даргыг саяхан огцорсон даруйд Улаанбаатараас очжээ. Тэрээр нутагтаа очсон даруйдаа аймгийнхаа эрх баригчдыг зөрчилдүүлж, намаа хагаралдуулж эхэлсэн гэнэ.