Дэлхийн технологийг дэргэд авчрах “Mongolia Mining 2014”

Урин хавар айлчилж, уул уурхайн компаниудын үйл ажиллагаа ид сэргэж буй энэ цаг дор “Mongolia mining 2014”олон улсын үзэсгэлэн үүдээ нээлээ. Уул уурхайн тоног төхөөрөмжийн үйлдвэрлэлээр дэлхийд тэргүүлэгч, нөгөө талаар зорилтот зах зээлээрээ Монголыг “онилсон” 120 компанийн төлөөлөгчид өчигдөр “Буянт-Ухаа” цогцолборт хурав. “Аливаа компани техник, технологийн шинэчлэлийг хэр хурдан хийнэ,өрсөлдөх чадвар нь төдий чинээ сайжирдаг. Тиймээс Монголын уул уурхайн салбарт шилдэг технологийг нэвтрүүлэх зорилготой” хэмээн зохион байгуулах хорооны дарга Т.Баттулга уг үзэсгэлэнгийн зорилгыг тодотгов.

Монгол Улсын төсвийн орлогод уул уурхайн салбар жин дардаг.Эл эрэмбэ сүүлийн жилүүдэд мөн чанараа шинэчлэн, уул уурхайн салбар ДНБ-ий 21, аж үйлдвэрийн салбарын 60, нийт экспортын 89, гадаадын хөрөнгө оруулалтын 80 хувийг бүрдүүлдэг эдийн засгийн гол салбар болтлоо хөгжжээ. Үндэсний компаниудыг шинэ техник, технологиор цэнэглэх энэ үзэсгэлэнд Уул уурхайн дэд сайд О.Эрдэнэбулган оролцож байна. Тэрбээр “Дэлхийн нэн шинэ технологийг танилцуулахаас гадна энэ салбарт үйл ажиллагаа явуулж буй компаниуд хоорондоо бизнесийн харилцаа тогтооход чухал арга хэмжээ болж байгаад бид талархаж байна” хэмээгээд Уул уурхайн яамны зүгээс энэ үйл ажиллагааг байнга дэмжиж ажиллахаа илэрхийллээ. Монгол Улсын уул уурхайн салбарын хөгжилд, түүнд дагалдах дэд бүтцийн салбарт сүүлийн жилүүдэд ойролцоогоор 60-80 тэрбум ам.доллар хэрэгтэй байгааг тэрбээр энд тодотгов. “Тиймээс та бүхэн хөрөнгө оруулах, техник технологио нийлүүлэх , уул уурхайн үйлчилгээг үзүүлэх өргөн боломж Монголд байна. Монгол Улс бүхий л боломжоо хөрөнгө оруулагчидтай хуваалцдаг, тоглоомын дүрмээ хүндэтгэж, амлалтаа үргэлж биелүүлдэг” гэдгийг онцолсон юм.Үзэсгэлэнд уригдсан хүндэт зочид үг хэлсний дараа харанга дэлдэж, цам бүжиг үсэргэснээрүзэсгэлэнг албан ёсоор нээлээ.

Цогцолборын төв танхим тэг дугуй хэлбэртэй агаад үзэсгэлэнд оролцогч дэлхийд тэргүүлэгч компаниуд энд хэдийнэ байраа эзэлжээ. Танхимын төв хэсэгт ХБНГУ-ын “SEW Eurodrive”компани бууриа засчээ. Тус компанийн Монгол дахь төлөөлөгчийн газрын захирал Б.Очирбат “Дэлхийд ашиглагдаж байгаа хамгийн дэвшилт, шинэ техник технологийг Монголын зах зээлд нэвтрүүлэх гүүр” хэмээн уг үзэсгэлэнг “томъёолов”. ХБНГУ-ын эл компани “Mongolia mining 2014” үзэсгэлэнд дөрөв дэх жилдээ оролцож буй агаад энэ удаа уул уурхайн зориулалттай конвейерийн тоног төхөөрөмж, давтамжийн хувьсгуур зэрэг электрон эд ангийг Монголын уул уурхайн компаниудад ХБНГУ, Чех, Финлянд улсаас шууд нийлүүлэх сонирхолтой байгаа аж.

“SEW Eurodrive”-ын дэргэд дэлхийд алдартай АНУ-ын “Joy Global”-ынхан байна. Энэ онд 130 дахь жилийнхээ “төрсөн өдрийг”тэмдэглэж буй, салбартаа тэргүүлэх гигантч гэсэн Монголд хараахан хөл тавиагүй эл компани манай зах зээлийг асар их сонирхож буйгаа дуулгалаа. Тус компанийн Евразийн худалдаа, маркетинг хариуцсан захирал Паул Фримэнтэй цөөн хором ярилцав.

-Монгол Улсад үйл ажиллагаа эрхлэхээр зэхэж байгаа гэсэн үү?

-Монгол Улсыг маш сонирхолтойзах зээл гэж бид харж байна. “Joy Global”Монголд хэдийгээр албан ёсны төлөөлөгчгүй ч гэсэн байгуулах талаар судалж байгаа. Манай компани маш олон төрлийн тоног төхөөрөмж үйлдвэрлэдэг, тэдгээр нь Монголын эрс тэс уур амьсгалд тохирсон, нийцсэн байдаг. Монгол Улсад нэлээд хэдэн гүний уурхай ойрын жилүүдэд ашиглалтад орох гэж байгаа юм билээ. Гүний уурхайн маш сайн чанарын, аюулгүй байдлыг дээд зэргээр хангасан тоног төхөөрөмж нийлүүлэхэд бид бэлэн байна.

-Тухайлбал ямар тоног төхөөрөмж нийлүүлэх вэ?

-Ил уурхайн экскаваторуудыг манайх үйлдвэрлэдэг. Түүнээс гадна гүний уурхайн конвейер, тунель ухагч төхөөрөмжийг нийлүүлэх сонирхолтой байна гэв.

Эдгээр гадна дэлхийд алдартай олон компани энд хүрэлцэн иржээ. Тоймтой хэлбэл, хүнд машин механизмын хөдөлгүүр үйлдвэрлэгч “Cummins”, Европын холбоо, АНУ, Азийн орнуудад үйл ажиллагаа явуулдаг “Sensor”групп,ОХУ-ын “Уралмашзавод”, Сингапурын “Vermeer”, Японы “Mitsubishi”группийн охин компани “Ryoko Sangyo”, Австралийн “Scantech”, Туркийн “Sahinle metal”, Польшийн “Sempertrans” болон БНХАУ-ын хүнд машин механизм үйлдвэрлэлийн хэд хэдэн компани энд төлөөлөгчөө ирүүлсэн байна.

Монгол Улсад уул уурхай, хөрөнгө оруулалтын эрх зүйн орчин нэлээд сайжирч, тогтвортой, ил тод болж, хөрөнгө оруулагчдад илүү их боломж олгосон ийм цаг үед эл үзэсгэлэн зохион байгуулагдаж буйгаараа онцлог. Тийм ч учраас “Монгол Улсын Засгийн газар нээлттэй ил тод, хариуцлагатай, хүнд сурталгүй, авлигагүй ийм үйл ажиллагааг ханган нийлүүлэгч, хөрөнгө оруулагчдадаа үзүүлэх болно. Нөгөө талаар уул уурхайн салбарт үйл ажиллагаа явуулж буй бизнес эрхлэгч та бүхнээс тэргүүний техник технологи, байгаль орчинд ээлтэй, хөдөлмөрийн аюулгүй байдлыг хангасан хариуцлагатай уул уурхайг Монгол Улсад байгуулахыг хүсэж байна” хэмээн Уул уурхайн дэд сайд О.Эрдэнэбулган тодотгож байлаа. Тэрбээр үзэсгэлэнгийн танхимыг тойрч, бүхий л ханган нийлүүлэгчидтэй уулзсан бөгөөд үзэсгэлэнд оролцогчид дэлхий дахинд гарч байгаа хамгийн сүүлийн үеийн техник технологийг Монголд нэвтүүлэхийг зорьж байгаад сэтгэгдэл өндөр байгаагаа илэрхийлсэн. “Дэлхийн тэргүүлэгч, глобал компаниуд Монголыг сонирхож, орж ирнэ гэдэг нь эдийн засгийн асар өндөр ач холбогдолтой” гэлээ.

Дэлхий даяар уул уурхайн тоног төхөөрөмжийн асар олон үзэсгэлэн зохион байгуулагддаг. Гэхдээ дэлхийн технологийг заавал бөмбөрцгийн баруун бөөрөнд очиж биш, Монголдоо, дэргэдээсээ хараад, харьцуулаад сонгох бололцоо бүрдүүлж буйгаараа Монголд зохион байгуулагдаж байгаа энэ үзэсгэлэн ач холбогдолтой юм. Монголын уул уурхайн салбарт тэргүүлэх технологи ашиглаж буй компани бийг үгүйсгэхгүй ч дийлэнх нь олборлолт, боловсруулалтыг хуучин уламжлалт техник технологи ашиглан хийдгийг “Эрдэнэс МГЛ” компанийн гүйцэтгэх захирал О.Сайнбуян цохсон юм.

Үндэсний менежмэнттэй уул уурхайн тоног төхөөрөмжийн ханган нийлүүлэгчид энд оролцож буйг тодотгоё. Тухайлбал, том оврын машин механизмын тосолгооны материал, тосолгооны системүүдийг импортолдог “Ноён Хүрд” компани энд оролцож байна. Австралийн “Petro Industrial”компаниас шатахуун, шингэн хий хадгалах томоохон хэмжээний агуулах савнуудыг импортолдог болсноо эл үзэсгэлэнгийн үеэр танилцуулсан юм.

Үзэсгэлэн өнөөдөр, маргааш “Буянт-Ухаа” ордонд үргэлжилнэ. Гол танхимд үзэсгэлэн худалдаа, бизнес уулзалтууд тасралтгүй зохион байгуулагдахын зэрэгцээ “Эрдэнэс Монгол”, “Эрдэнэс Тавантолгой”, “Эрдэнэс Оюутолгой”, “Оюутолгой”, “Эрдэнэт”, “Багануур”, “Шивээ-Овоо” зэрэг уул уурхайн томоохон компаниуд төслүүдээ танилцуулах юм. Түүнчлэн уул уурхайн салбарын өнөөгийн байдал, хэтийн төлөвийн талаар Ашигт малтмалын газар, ураны нөөц хайгуул, олборлолтын асуудлаар Цөмийн энергийн газар форум зохион байгуулах аж.