”МАК” гадны компаниас 43 сая ам.долларын үйлчилгээ авна

Данийн Копенгагений хөрөнгийн биржид бүртгэлтэй “FLSmidth” групп Монголын нэгэн компаниас 43 сая ам.долларын захиалга хүлээн авсан тухай мэдээлэл шуугиан тарив. Инженеринг, уул уурхайн консалтингаар дагнан үйл ажиллагаа явуулдаг, олон улсад 15 мянган гаруй ажилтантай энэ компанийн монгол түнш нь “Монголын алт”/МАК/ групп гэдгийг “Global news wire”-т бичжээ. Энд бичихдээ "“FLSmidth” групп монгол захиалагчаас маш том санал авлаа" гэсэн байв.

“МАК” групп энэ том компанид Цагаан суваргын зэс, молбиденийн уурхайдаа инженеринг, барилга бариулах ба мөн худалдааны зөвлөгөө авахаар ийнхүү гэрээлсэн гэнэ. Хамгийн гол нь 43 сая нь гэрээний нийт зардал биш дөнгөж анхан шатны хөрөнгө оруулалт юм байна. Мөн “FLSmidth” компани “МАК”-аар дамжуулж Монголын уул уурхайд орж ирэх хүсэлтэй байгаа нь олон улсын анхаарлыг хамгийних татаж байгаа аж.

Оюутолгойн зэс порфирийн ордоос зүүн өмнөл хэсэгт оршдог, батлагдаагүй нөөц нь бараг Оюутолгойнхтой дүйхүйц Цагаан суваргаас өдөрт 40 мянган тонн хүдэр баяжуулан гаргах төлөвлөгөөтэйгөөр шинэ баяжуулах үйлдвэр байгуулж байгаа юм.

“FLSmidth” одоогоор гэрээний дагуу гол технологиудыг нийлүүлээд эхэлсэн байна. Гэрээг дөнгөж саяхнаас байгуулж байгаа юм ч биш. Бүр 2011 онд ярилцаад тохирсон байжээ. “МАК” группийн хувьд төрөлжсөн бизнесээр үйл ажиллагаа явуулдаг, Монголын гуравдахь том компани. Үүн дотор нь алт, нүүрсний төслүүд багтаж байгаа. “FLSmidth”-тэй хамтарч буй төсөл нь энэ групп зэсийн салбарт ажиллаж буй анхны төсөл болох юм.

Д.Маргад