Н.Алтанхуяг МАН-ын үнэлэмжийг өсгөчихлөө

Монголын улс төрийн тайзан дээр өнөөдөр МАН-ыг урьж байна. Тэднийг Засагт хамтраач ээ гэсэн заллага ирж, МАН-ын улс төрчид дотроо дуртай ч гаднаа бол тунирхаж ичингүйрсэн хүүхэд шиг ааш аяг үзүүлж байна. Өөрөөр хэлбэл, үнэд орж байгаа хэрэг. Хойшхи хоёр жил шахамын хугацаанд Засаг тогтвортой байх ганц баталгаа нь МАН болчихоод байна.

Тэд сөрөг хүчин болсноосоо хойш хамгийн том операциа амжилттай хэрэгжүүлж  Н.Алтанхуягийн Засгийн газрыг огцруулж чадлаа. Ерөнхийлөгч Ц.Элбэгдорж "UBS" телевизээр залуустай уулзах үеэрээ “МАН маш сайн тооцож байж Засгийн газрыг огцруулсан. Уг нь Монголд ашиггүй бол Ардын намд ашиггүй л байхгүй юу даа” гээд хэлчихнэ билээ.  Үнэхээр энэ огцруулалт цагаа олоогүй байснаас гадна МАН-д  Засагт эвсэх боломжоос өөр юу авчирахыг хэлэхэд бэрх.  Ямартай ч ам нээх бүрдээ сөрөг хүчнээ доош нь хийдэг Н.Алтанхуягаас зүгээр “өшөө авсан” хэрэг биш байсныг улс төрийн өнөөгийн дүр төрх харуулж байна. Үүний цаана Засагт хамтрах гэсэн холын санаа, ойрын алхам байсан болж таарав. УИХ дахь МАН-ын  бүлгийн ахлагч  урьд нь засагт хамтрахгүй гэдгээ удаа дараа итгэл төгс мэдэгдэж байсан.  Харин яг одоогоор бол “Улсаа бодвол Засагт хамтрамаар байна. Намаа бодвол эвсмээргүй байна”  гэж ичингүйрч  байна. Ингэж тунирхаж, санаагаа цээжний цаана нууснаараа үнэ цэнээ илэрхийлж байх шиг. Юу ч гэж ойлгомоор юм бэ дээ, бүү мэд. Хэрэв Засагт хамтрахгүй бол улсаа бодохгүй гэсэн үг ч юм шиг. Аль эсвэл МАН засагт орж байж л энэ улс орон өндийж сэхнэ гэсэн санаа  юм уу.

Одоо бодоход МАНАН-гийн симфони бүр эртээс эгшиглэж эхэлжээ. Х.Баттулга, У.Хүрэлсүх нар хамтран Б.Анужингийн телевизийн нэвтрүүлэгт орж баахан улс төр ярив даа. Тэр бол нийгмийн сэтгэхүйг МАНАН-г хүлээн авахад дасгах анхны хувилбар байж таарав. Тэдний энэ тооцооноос харин Ерөнхий сайд нь төөрчих шиг боллоо.  Алтанхуягаас хариугаа  нэхэх тэдний төлөвлөгөөгөөр бол хамтарсан Засгийн газрын тэргүүн нь  Х.Баттулга, аль эсвэл Р.Амаржаргал  хоёрын хэн нэг нь болох  магадлал түлхүү байсан байх учиртай. Улс төр гэдэг угаасаа  урвалтаар дүүрэн, тэдний санаагаар болсонгүй. Түүнээс гадна эрх баригч хүчний дунд ч хамтарсан Засгийн газрыг дэмжигчид нэг бус бий. Тэдний нэг төлөөлөл болох С.Баярцогт бүр анхнаасаа Эв нэгдлийн Засгийн газрын тухай байн байн сануулдаг. Иймэрхүү хандлага санаа бодол цухалзах бүрд МАН-ын  Засагт  хамтрах холын санааг ойртуулсаар ирсэн.  Энэ нь МАН-ыг анхнаасаа Засгийн  гадна, хаалганы цаана  үлдээсэн  Н.Алтанхуягийн Засгийн газрыг огцруулах итгэл магадлалыг нь тэр хэрээр бататгалаа.

Н.Алтанхуяг  Ерөнхий сайд, намын дарга ч үгүй үлдэж нэг мөр “шар”-аа шувтлуулснаар  сөрөг хүчнийхээ тавьсан занганд орчихлоо. Ингэснээр тэр өөрийнх нь хэлсэнчлэн “Монголын нийгэм дэх нэг намын олон жилийн нөлөөллийг бууруулахын тулд МАН-тай эвсэхээс анхнаасаа татгалзаж, тойргийн гадна үлдээсэн”-ийхээ хариуг хүртлээ.  Харамсалтай нь тэр сөрөг хүчнийхээ үнэлэмжийг энэ ялагдлаараа өсгөчихөөд явж байна.

П.Булган