Гаргасан шийдвэртээ гарцаагүй байдалд орсон мэт тайлбар дайж байгаа чинь таалагдахгүй байна, МАН-ынхаан

Өчигдөр МАН-ын бүлэг хуралджээ. Энэ хурлын дараа МАН-ын Ерөнхий нарийн бичгийн дарга Ж.Мөнхбат, бүлгийн орлогч дарга Д.Оюунхорол нарын хүмүүс сэтгүүлчдэд мэдээлэл өгсөн байна.  Тэд энэ үеэр Засагт яагаад хамтрах болсноо “МАН-ын бага хурал  Ерөнхий  сайд Ч.Сайханбилэгээс ирүүлсэн  Засгийн газарт хамтран ажиллах  саналыг дэмжихдээ намынхаа эрх ашгийг  бус улсынхаа эрх ашиг, эдийн засгийн хямралаас  яаж гарах вэ гэдэг зарчмыг нэгдүгээрт тавьсан” хэмээн тайлбарлажээ. Энэ бол хуучны танил үг. Тэд ийм тайлбарыг Н.Алтанхуягийг Засгийн эрхэнд байхад ч хэлж байсан. Өөрөөр хэлбэл “Аргагүйн эрхэнд л бид хамтарлаа шүү. Хамтрахгүй бол улс орны байдал хэцүүдэх гээд байна” гэдэг мессежийг бидний ой тоонд дахин дахин сануулаад байгаа хэрэг. Ингэж намаа “Золигт гарган” байж хамтарсаныг буруутгах аргагүй, олон нийт ч талархалтай хандаж байгаа байх. 

Харин хамтарсаныхаа араас уйлагнах хэрэг бол огт байхгүй. Бусдын гуйлга шахалтан дор эсвэл аргагүйн эрхэнд ийм шийдвэр гаргачихсан юм шиг, үгүй бол томорч тодроод байгаа юм шиг үг хэллэг хамтрах шийдвэрийнхээ араас чулуудаж байгаа нь  АН-ынхан болон  иргэдэд тийм ч таатай санагдахгүй байх. Уг нь улс төрийн соёл гэж том ухагдахуун байдаг сан.

Өчигдөр болсон хэвлэлийн бага хурлын үеэр тус намын ЕНБ-ийн дарга  сэтгүүлчийн асуултад хариулахдаа “Бид засагт оръё гэж гуйгаагүй. Биднийг орооч гэж хүссэний дагуу  дүрмийн дагуу хуралдаж шийдвэрээ гаргасан” хэмээн “томров”. 

МАН-ын бүлгийн дэд дарга  Н.Номтойбаяр энэ үеэр мөн л  “Бодлогын алдаа гаргаснаа хүлээн зөвшөөрхийг шаардсан байгаа. Одоогоор тодорхой байр суурь илэрхийлээгүй ч алдаа гаргаснаа Ажлын хэсэг дээр хүлээн зөвшөөрсөн” гэжээ. Далан таваар буулгаж авч байгаа бололтой юм. Түүнчлэн хамтрах асуудлаарх МАН-ын ажлын хэсгийг ахалж байгаа УИХ-ын гишүүн Су.Батболд   хамтарсаныгаа “Улс төрийн энэ шийдвэр МАН-д хохиролтой байж болох ч улс орны эдийн засгийн өнөөгийн байдлыг авч үзэхэд хариуцлагатай хүчний хувьд зайлшгүй шийдвэр болсон” гэж  ярилцлагадаа онцолжээ.

МАН Засгаас гарах эсэх талаарх сэтгүүлчийн асуултад мөн л  “МАН... өнөөдөр нэг юм яриад маргааш өөр юм ярьдаг улстөрийн хүчин биш. Засагт хамтарсан улстөрийн хүчнээс хамаарна” гэж булзав.  Бүх юм сөрөг талаас нь шалтгаалах бололтой юм.

Эе эвийг сахиж эвлэрлийн Засгийн газар байгуулахаар зорьж байгаа улс төрийн хүчнүүд хамтрах шийдвэрээ гаргасан бол ингэж дошин дээрээ томорч, нэгэнт гаргасан асуудлынхаа араас элдэв тодотгол дайх хэрэггүй л болов уу.

А.Алтантуяа