“Altai Palace” казиногийн хамгийн өгөөмөр үйлчлүүлэгч нь монголчууд

Алтайн хязгаарт нээгдсэн Altai Palace казинод шинэ оны өмнө Новосибирск хотын нэг иргэн 1.3 сая рубль хожижээ.  Энэ бол казино нээгдсэнээс хойшхи хугацааны хамгийн их мөнгөн дүнгээр илэрхийлэгдэж буй хожил гэнэ.  

Энэхүү “Сибирийн зоос” нэртэй тоглоомын бүс өнгөрөгч арваннэгдүгээр сараас  ажиллаж эхлээд байгаа юм. Өөрөөр хэлбэл  Altai Palace бол Сибирийн бүс нутаг дахь анхны хууль ёсны казино бөгөөд шинэ жилийн амралтаа энд өнгөрүүлэх гэсэн олон тооны жуулчины хөлд дарагдсан гэнэ.  Шинэ оны эхний шөнийг энд өнгөрөөхөөр 100  гаруй зочин иржээ. Ирсэн зочдын ихэнх нь казинод тоглож, хоёр цагаас доошгүй хугацаанд саатдаг. Орон нутгийн жуулчны баазуудад амарч байгаа хэн боловч ийшээ зүглэхгүй байна гэж бараг үгүй. Түүнээс гадна хилийн чанадаас  ирж тоглогчдын ихэнх нь хятад, араб, монголчууд байдаг.

Шинэ жилийн орой буюу 31-ний үдэш казинод азаа үзэгчдийн ихэнх нь хятад, арабууд байсан гэдгийг тоглоомын газрын дарга Роман Сподырев тодотгожээ.

Энэхүү казино нээгдээд удаагүй, дөнгөж арванхоёрдугаар сарын  сүүлчээр л тоглоомынхоо бүс тойргийг бүрэн хэмжээгээр нээсэн. Ингэснээр “Altai Palace” эдүгээ 500 хүнийг нэг дор хүлээн авах боломжтой болж байгаа юм. Одоогоор энд 16 ширээ, тоглоомын 80 гаруй аппарат  хэрэгсэл байна. Ойрын үед бүр олон болно. “Altai Palace”-хан тоглоомын тоног төхөөрөмж үйлдвэрлэгч  Германы компанитай гэрээ хэлцэл байгуулжээ. Түүнчлэн оны дараах бямба гаригаас  дэлхий нийтийн сонирхлыг  татдаг покерийн клубын тоглолт  болно.  Алтайн хязгаарын энэ казино эргэн тойрондоо 1000 км-ийн радиус бүхий газар нутаг дахь цорын ганц хууль ёсны зөвшөөрөлтэй газар гэдгээрээ ялгардаг  юм. 

Энд та хамгийн бага нь 5 ам.доллараас эхлээд 100 ам.доллараар тоглож болно.  Гадаад валютын ханшийг  тоглоомын танхимаас  шууд харж тооцох боломжтой.  Тоглоомын газар нээгдэж байх үед нэг ам.доллар 40 рубльтэй тэнцэж байсан бол одоо 50 рубль болж нэмэгдээд байна.

Altai Palace-д хэн ч нэвтэрч болно. Харин сануулахад  тоглоод алдахад харамсахгүй гэсэн тодорхой хэмжээний мөнгөтэй байх хэрэгтэй. Түүнчлэн өөрийгөө хэн болохыг нотлох бичиг баримт хэрэг болно. Харин насны хувьд 18 хүрсэн байх учиртай.  

Зочдын үндсэн сонирхол бол покер тоглох байдаг. Бас эндээс тэд чамгүй мөнгө хожиж чаддаг. Ирсэн зочдын 70 хувь нь покер тоглодог бол 20 хувь нь рулет, үлдсэн хэсэг нь  блэкжек /blackjack/-ийг илүүд үздэг.  

Казино ажиллаж эхэлсэн эхний энэ хоёр сар зөвхөн VIP журмаар үйлчилж байв. Харин энэ хугацаанд  мянга гаруй хүн үйлчлүүлжээ. Тэдгээр нь ихэвчлэн ойролцоох Челябинск, Екатеринбург, Омск, Новосибирскийн оршин суугчид байлаа. Цуу яриа байсан уу, Омскоос ирсэн залуучуудын буцах бензиний мөнгийг нь  тоглоомын газрынхан өгсөн гэж ярьцгааж байсан.

Энэ казиногийн хүндтэй зочдын нэг нь монголчууд.  Тоглоомын газрын удирдах ажилтны батлан өгүүлснээр монголчууд казиногийн хамгийн өгөөмөр үйлчлүүлэгчид гэнэ. Тэд энэ талаараа хэнийг ч урдаа  гишгүүлэхгүй гэжээ. 

Тоглоомын газрын дарга Роман Сподырев “Үнэнээ хэлэхэд зочид их цөөн байх болов уу хэмээн эмээж байлаа. Сибирьт хууль ёсны казино ажиллаж байгааг хүмүүс тэр бүр мэдэхгүй. Гэвч зочид маань боломжийн орлого ашиг оруулж эхэлсэн. Тоо хэмжээг нь тоочих гээд яахав. Тэдний оруулсан орлогоор  дээд давхараа ашиглалтад оруулаад байна” гэж ярьжээ.

Казинод одоо 50 орчим диллер ажиллаж байна. Тэдгээр залуус Крым, Перм,  Эрхүү хотоос ирцгээжээ.  Гэхдээ эндхийн ажилтнуудын ихэнх нь  орон нутгийнхан буюу Барнаул, Бийск хотынхон ажээ. Казиног эзэмшигчид Алтайн хязгаарт диллер бэлтгэх сургууль нээхээр төлөвлөж байгаа гэсэн мэдээг оросын нэгэн сайтаас товчлон авав.

П.Булган