Оросууд Монголын эсрэг цөмийн зэвсэг ашиглаж болно. Яагаад?

Дэлхийн гуравдугаар дайн хаяанд ирсэн тухай Горбачев анхааруулав

Манай хойд хөршийн социалист удирдагч асан Михайль Горбачев дэлхийн гуравдугаар дайн хаяанд ирсэн тухай  Оросын нэгэн хэвлэлд ярилцлага өгөхдөө анхаарууллаа. Мөн ОХУ зөвхөн Монгол, Финляндын эсрэг цөмийн зэвсэг ашиглахад ямар нэгэн дипломат хаалт байхгүйг онцолжээ. Учир нь Москва дэлхийн бусад орнуудтай янз бүрийн гэрээ хэлэлцээр байгуулсаар Монгол, Финлянд  гэсэн хоёрхон улс л үлджээ. Тодруулбал энэ хоёр улсын эсрэг цөмийн зэвсэг хэрэглэхэд цаасан дээрх ямар ч хорио байхгүй болсныг онцолсон байна.

Түүний үзсэнээр дэлхийг хоёр хуваах улстөрийн зөрчил энэ онд улам бүр цэцэглэж, дэлхийн гуравдугаар дайнд Орос, АНУ бусад орнуудыг татан оролцуулах нөхцөл байдал бүрдэх гэнэ. Тэрбээр ирээдүйн дайныг “Хүйтэн дайн 2” бус “Халуун дайн” гэж нэрлэлээ. Учир нь цөмийн зэвсэглэлээр хөөцөлдөгч орнууд өнгөрсөн жилүүдэд боловсруулж эхэлсэн цөмийн цэнэгт пуужингуудаа дайсагнагч талынхаа эсрэг ээлжлэн турших аж.

Одоо АНУ-ын барьж байгаа бодлого зөвхөн Ойрхи Дорнодын зөрчлийг намжаахад бус Украин, Гүрж, зүүн Европын орнуудыг өөрийн талд эргүүлэх зорилготой бөгөөд энэ нь Оросыг ганцаардуулах цор ганц хүслийн илрэл аж. Энэ нь дэлхийн гуравдугаар дайнд өдөөгдөх гол хүчин зүйл болох гэнэ.

 Сүүлийн жилүүдэд Оросын ерөнхийлөгч Владимир Путин Европ дахь пуужингийн довтолгооноос хамгаалах системийг хүчтэй шүүмжилж ирсэн юм. АНУ зүүн Европын зарим оронд ийм систем суурилуулж, болзошгүй аюулаас сэргийлэхийг уриалан, энэхүү бодлогодоо үнэнч зогссоор байна. Үүнээс шалтгаалж В.Путин бүс нутагтаа Хятад, Энэтхэгтэй хамтран цэрэг зэвсэглэлийн цоо шинэ холбоотон-нийгэмлэг байгуулах ажилд яаравчилна гэж Михайль Горбачев үзжээ.

“Яах аргагүй дэлхийн гуравдугаар дайн АНУ, ОХУ-ын зөрчлөөс улбаалж үүснэ. Америкчууд Украиныг тэг голоор нь хуваачихлаа. Мөн тэд Сири, Йемен зэрэг Арабын орнуудад ямар ч үр дүнгүй эмх замбараагүй байдал үүсгэсэн. Лалын улсууд нэгдэж халифын нэртэй гүрэн байгуулахаар улайрч байна. Яваандаа энэ хүчин маш олон сая хүний дэмжлэг авбал АНУ-ын талд муу. Нөгөөтэйгүүр Европыг хуваасан төмөр хөшигний бодлого дахиад сэргэнэ. Нэг тал нь АНУ, нөгөөх нь мэдээж Оросын дэмжлэгийг авснаар энэ хоёр гүрний дунд асар том сөргөлдөөн өрнөж эхлэх юм” хэмээн Горбачев онцолжээ.

Цөмийн зэвсэг харилцан үл хэрэглэх гэрээ гэдэг нь тоглоом

Мөн хуучин Зөвлөлтийн армийн Батлан хамгаалахын сайд, Хурандаа генерал асан Леонид Ивашов “Правда” сонинд “Дэлхийн тэргүүлэгч гүрнүүд нэгнийхээ эсрэг цөмийн зэвсэг үл хэрэглэх гэрээ нэртэй тоглоомын дүрэм байгуулдаг. Энэ бол зүгээр л хар дарсан тоглоом. Цагаа тулбал АНУ-ын алан хядагчдын эсрэг тэмцэж байгаа дүр эсгэсэн цөмийн үйлдвэрлэл Москвагийн улаан нүүр рүү л чиглэнэ. Одоогоор дэлхийн тэрбумтнууд, олигархиуд ирээдүйн дайныг санхүүжүүлж магадгүй. Хамгийн гол нь дайныг хэн нь эхлүүлэх вэ гэдэг дээр л асуудал оршиж байгаа” хэмээн ярьсан байна.    

 Ивашовын үзснээр Америк дайныг эхлүүлэхийн өмнө эдийн засгийн аргаар хохирол учруулахаар улайрч буй гэнэ. Тухайлбал, дайн хийхэд юун түрүүнд газрын тосны хангамж асар их хэрэгтэй болно. АНУ ч энэ талын баазаа сайн хангаж, эсрэгээр Оросын газрын тосноос олох ашгийг бууруулахын тулд энд тэндгүй дайн эхлүүлдэг гэжээ.

Мөн тэрбээр нэмж ярихдаа “Оросууд Латин Америкт цөмийн зэвсэг байрлуулах хамгийн тохиромжтой бүс нутаг. Энэ нь Москвагийн барьж болох ашигтай тактикуудын нэг байх болно” гэсэн юм.

“Бинго”

Америкчуудын ирээдүйн дайнаас айж байгаа зүйлсийн нэг бол өөрсдийнх нь нутагт, гэрийнх нь үүдэнд ч зогсч байж болзошгүй буутай алан хядагчид.  Тэд өөрсдийнх нь нутаг дэвсгэрт алан хядах дайн гарахаас сэргийлж, үүний эсрэг асар их мөнгө хаяж байна. Магадгүй АНУ хилийн хамгаалалтаа сайжруулахаас илүү дотоод дахь гэнэтийн халдлагуудын эсрэг гол анхаарлаа хандуулж мэдэх юм.

Яг одоо АНУ, ОХУ-ын талд зогсогчид болон тэд өөрсдөө, дотооддоо зэвсэглэл батлан хамгаалахын далд өрсөлдөөн, зогсолтгүй үргэлжлэх үйлдвэрлэлд шаргуу анхаарлаа хандуулж байна. Биднийг Холливудын амттай кино үзэх зуур, Оросын театрт сонгодог жүжиг тавигдаж байх хооронд, тэдний зэвсгийн агуулахууд улам бүр зузаарсаар байгаа.

Ивашовын хэлснээр, Орос орон яг одоо цөмийн зэвсэглэлд урьд өмнөхөөсөө ч илүү анхаарал хандуулах ёстой, томоохон төслүүдийг эхлүүлж цөмийн үйлдвэрүүдийг сэргээх хэрэгтэй гэсэн байна. Тэрбээр “Америкчууд ганц балластик пуужинтай гэж байгаа ч тэдний бүхэл бүтэн байгууламжууд бий. Энд устөрөгчийн бөмбөгүүд хэдэн арваараа өрөөтэй байгаа” гэжээ.

 Т.Батсугар