С.Баярцогт хийсэн алдаагаа 17 тэрбумаар засах уу

Амеркийн хуулийн фирмд 17 тэрбум төгрөг өгч хуулийн зөвөлгөө авна гэхийг бодоход монголчууд бид ядраагүй бололтой. Хоёр хоногийн өмнө Засгийн газрын хэрэг эрхлэх газраас төсвийн байнгын хороонд  Америкийн “Пэнтер лоу” фирмээс “Оюу толгой”-н тал дээр хуулийн зөвлөгөө үйлчилгээ авна гэж 17 тэрбум 500 сая төгрөгийн төсөвт өртөг тавьсан бичиг ирсэн байна. 17 тэрбум 500 сая төгрөгөөс өнгөрсөн жил 455 саяыг нь өгсөн бөгөөд энэ жилийн төсвийн тодотголд үлдсэн 17 тэрбум 45 сая төгрөгийг суулгахаар оруулж ирсэн нь энэ аж.

2015 оны төсвийн тодотголыг гурван долоон хоног дамжин хэлэлцэж буй. Засгийн газраас өргөн барьсан тодотгол хангалтгүй байсан учраас байнгын хороо, УИХ-ын чуулганаар ингэж удааж хэлэлцэж байгаа биз. Тодотгол өргөн барьсан цагаас эхлэн нийгэм хүүхэд, одонтой ээжүүдийн мөнгө, prius-ын татвараар амьсгалж, хүчтэй тэмцсэний үр дүнд бүхнийг хуучин хэвэнд нь үлдээхээр болсон.

Төсвийн алдаа мадгаа засаад гурван долоон хоногийн дараа батлах гэж байхад 17 тэрбум 500 сая төгрөгийг гадны хуулийн фирмээс хуулийн зөвөлгөө авахад зориулан төсөвлөж байгаа нь дөнгөж өчигдөр олон нийтэд ил боллоо. “Оюутолгой”-н гэрээг 2008 онд батлахад тухайн үеийн Засгийн газар, Ерөнхий сайд С.Баяр, одоогийн Засгийн газрын Хэрэг эрхлэх газрын дарга С.Баярцогт маш сайн гэрээ болсон хэмээж байсан. Үнэн хэрэг дээрээ “Оюутолгойн”-н хөрөнгө оруулалтын гэрээ монголчуудад үр өгөөжөө өгөөгүй гэж хэлэхэд хилсдэхгүй. Монголын Засгийн “Рио Тинто”-гын аманд багтаж, тавьсан шаардлагыг нь биелүүлээд л явж байгаа. Гэтэл энэ гэрээг сайжруулахын тулд төсвөөс 17 тэрбумыг зарцуулна гэдэг байж болшгүй зүйл. “Оюутолгой”-н хөрөнгө оруулалтын гэрээ сайн хийгдвэл монголчуудад ашигтай байх нь мэдээж. Гэхдээ энэ гэрээг сайжруулахын тулд татвар төлөгчдийн мөнгөнөөс бус тухайн үеийн Засгийн газар болон эрх мэдэл бүхий хүмүүст хариуцлага тооцож, шаардлагатай хөрөнгө, мөнгийг нь гаргуулах нь зүйн хэрэг бус уу. Засгийн газрын хэрэг эрхлэх газрын дарга С.Баярцогтыг “Оюутолой”-н хөрөнгө оруулалтын гэрээг муу хийсэн хэмээн “ангийн нөхөд” нь ч хатуухан шүүмжилдэг. Харин одоо тэр өөрийнхөө болон тухайн үед хамтарч ажиллаж байсан нөхдийнхөө хийсэн алдааг засахын тулд хүрч ядаж байгаа улсын төсвөөс багагүйг “хумслахна”.

Нөгөө талаараа муу хийсэн гэрээг сайжруулж, засчих хэмжээний хуульчид манайд байхгүй гэж үү. Социализмын үед ч манайх залуучуудаа хөгжилтэй орнууд руу явуулан боловсрол эзэмшүүлдэг байсан. Өнөөдрийн энэ цаг үед хэн ч, дуртай газраа, сонирхосон мэргэжлээрээ сурах бүрэн боломжтой болсон. Энэ ч утгаараа монголын залуучууд боловсролтой, чадалтай болсон гэдэгтэй маргах хүн үгүй биз. Гэтэл Америкийн “Пэнтер лоу” гэх фирмэд 17 тэрбум төгрөг төлж хуулийн зөвлөгөө авах болсон нь монголд “Оюутолгой”-н гэрээг сайжруулчих хэмжээний хуульчид байхгүй гэж хэлж байгаатай утга нэг.

“Panter Law” гэх хуулийн фирм нь АНУ-ын Флорида мужид байрладаг. Миаими хотын North Kendall Drive-ийн Panter Building барилгад үйл ажиллагаагаа эрхэлдэг юм байна. Байгуулагдаад  20 орчим жил үйл ажиллагаа явуулж байгаа бөгөөд хуулийн чиглэлээр гадна, дотнын компани, хувь хүнд зөвлөгөө өгдөг аж. Тус хуулийн фирмийн вэб сайтад “Манай компани Флорида муж гэлтгүй олон улсад алдартай. Хуулийн чиглэлээр бүх шатанд зөвлөгөө, үйлчилгээ үзүүлж ирсэн бөгөөд манай үйл ажиллагаанд үйлчлүүлэгчид маань үргэлж сэтгэл хангалуун байдаг. Пентар Лау хуулийн фирмээр үйлчлүүлж, хууль зүйн зөвлөгөө авсан хүмүүс өнгөрсөн хугацаанд 1 сая ам.доллараас илүү хөрөнгийг заргалдсан шүүхийн аль нэг шатнаасаа авч чадсан. Манай компани олон улсын уул уурхай, нийгэм, боловсролын салбарт үйл ажиллагаа эрхэлдэг компаниудад хуулийн зөвлөгөө өгдөг. Энэ тохиолдолд мэргэжлийн хуульчид гэрээ байгуулж, гэрээнд заагдсан хугацаанд хууль зүйн бүх шатны зөвлөгөө, мэдээлэл, сургалт өгнө” хэмээн бичжээ.

Л.Одончимэг

http://www.panterlaw.com/