Нэгдсэн төсвийн тэнцвэржүүлсэн тэнцэл алдагдалтай гарлаа

Төсвийн зарлагыг төлөвлөснөөс бага түвшинд барьж байгаа ч алдагдалтай баталсантай холбогдуулан төсвийн гүйцэтгэл алдагдалтай гарч байгаа тухай Сангийн сайд мэдээллээ. Оны эхний дөрвөн сарын байдлаар нэгдсэн төсвийн тэнцвэржүүлсэн нийт тэнцэл 663.6 тэрбум төгрөгийн алдагдалтай гарсан байна. Төсвийн орлого, тусламжийн нийт дүн 1.65 их наяд төгрөг буюу орлогын түвшин төлөвлөснөөс 10.9 хувиар доогуур гарчээ. Харин өнгөрсөн жилийн эхний дөрвөн сартай харьцуулахад 23 тэрбум төгрөгөөр доогуур дүн болж байна. Нийт зарлага, цэвэр зээлийн нийлбэр дүн өнгөрсөн оны мөн үеэс 398 орчим тэрбум төгрөгөөр өндөр зардалтай гарлаа. Энэ нь төлөвлөсөн зардлаас 24.9 хувиар доогуур түвшинд байгаа аж. 2016 оны Монгол Улсын нэгдсэн төсвийн нийт орлогыг 7 их наяд төгрөг, нийт зардлыг 7.9 их наяд төгрөг байхаар, алдагдал 940.5 тэрбум төгрөг буюу дотоодын нийт бүтээгдэхүүний 3.4 хувьтай тэнцэх хэмжээгээр баталсан байна. Оны эхний дөрвөн сарын байдлаар төлөвлөсөн жилийн нийт орлогын 23 орчим хувь нь төвлөрсөн бол төлөвлөсөн зарлагын 28 хувь нь зарцуулагджээ. Төсвийг тодотгох шаардлагатай байгааг Сангийн сайд Б.Болор онцоллоо.