Улаанбаатар хотын ямар барилгууд газар хөдлөлтийн найман баллд тэсвэртэй вэ

Улаанбаатар хот орчимд найм хүртэлх магнитудын хүчтэй газар хөдлөлт болоход нийслэлийн барилга байгууламжийн 20-50 хувь нь нурж, хүн амын 30-60 хувь нь өртөх магадлалтай талаар Онцгой байдлын ерөнхий газар мэдээлсэн. Улаанбаатарын төв хэсэгт орон сууц болон нийтийн хэрэгцээний 24.7 мянга орчим барилга бий. Эдгээрийн дийлэнх нь 1970-аад оноос өмнө барьсан, бэхэлгээ хийгдээгүй барилгууд юм. Харин сүүлийн жилүүдэд барьсан төмөр, бетон хийцтэй барилгуудын дийлэнх нь газар хөдлөлтөд тэсвэртэй. Тухайлбал, "Blue Sky" хотхон, "Рапит харш", Хурд группийн "Хүннү хороолол", "Happy Town", "Japan Town" зэрэг цутгамал бетон, карказ хийцтэй барилгууд нь газар хөдлөлтийн найман баллд тэсвэртэй гэж мэдээлсэн. Мөн хүүхдийн цэцэрлэг, сургууль газар хөдлөлтөд тэсвэргүй байгаа юм. Улсын хэмжээнд төрийн өмчит ерөнхий боловсролын 650 гаруй сургуулийн 25 хувь нь буюу дөрвөн сургууль тутмын нэг нь, 700-аад цэцэрлэг байгаагаас 20 хувь нь буюу таван цэцэрлэг тутмын нэг нь газар хөдлөлтөд огт тэсвэргүй, шууд нурах эрсдэлтэй байна. Нийслэлийн Ерөнхий төлөвлөгөөний газрын Барилгын чанар, аюулгүй байдлын хэлтсээс мэдээлснээр таван магнитудын газар хөдлөлтөд тэсвэргүй 78 сургууль, 103 цэцэрлэг байгаа аж. 2015 онд Гүнжийн сүм орчимд 4.4 магнитудын хүчтэй газар хөдөлсөн нь Улаанбаатарын ойролцоох хамгийн хүчтэй газар хөдлөлтөд тооцогдож байна. Түүнчлэн сүүлийн жилүүдэд газар хөдлөлтийн давтамж, магнитудын хэмжээ нэмэгдэх хандлагатай байгаа юм. Хүн ам хамгийн их төвлөрсөн Улаанбаатар хотод зөвхөн орон сууцны барилгаас гадна гэр хорооллын мод, тоосгон байшинг зураг төсөлгүй барьж байгаа учраас газар хөдлөлтөд тэсвэргүй гэж "JICA"мэдээлсэн.