Төв банк: Алт тушаалт оны эхний есөн сард 13.7 тоннд хүрч нэмэгдэв

Монголбанкны мэдээлснээр есдүгээр сард тушаасан алтны хэмжээ 13.7 тоннд хүрсэн нь жилийн өмнөхтэй харьцуулахад 34 хувиар нэмэгдсэн үзүүлэлт аж. Тиймээс оны эцэст алт тушаалт

өссөн дүнтэй гарна гэсэн таамагтай байгааг Төв банк онцоллоо. 2015 онд Монголбанк жилийн дүнгээр 15.1 тонн алт худалдан авсан нь өмнөх оноос 18.2 хувиар өссөн дүн юм. Алт тушаасан иргэдийн тоо мөн өсч давхардсан тоогоор 2026 иргэн, 1858 ААН хамрагджээ. Алт тушаах сонирхол 2014 оноос буюу холбогдох рояалтиг 2.5 хувь болгосноор эрс нэмэгдсэн. 2013 онд давхардсан тоогоор 1449 ААН болон гурван иргэнээс алт худалдан авч байсан бол 2014 онд 2002 ААН, 1098 иргэн Монголбанкинд алт тушаажээ. 2005 онд Төв банкны худалдан авсан алт 1990 оноос хойшхи хамгийн дээд хэмжээ буюу 15.23 тоннд хүрч байжээ. Харин үүнээс ч өндөр хэмжээний буюу 20 тонн алтыг энэ онд худалдан авахаар Монголбанк 2016 оны төсөвт суулгасан. Улмаар 2017 оны төсвийн төсөлд 14.7 тонн алт экспортлохоор төсөөлжээ. Одоогоор улсын хэмжээнд оны эхний найман сард 9.6 тонн алт экспортод гаргаад байна. Мөнгөний бодлогын 2017 онд баримтлах үндсэн чиглэлд алтны үнийн төсөөллийг 2016 онд 158 ам.доллар, 2017 онд 100 ам.доллараар нэмэгдүүлж бодсон аж. Даваа гарагийн спот ханшийг харвал, нэг унци нь 1268 ам.доллар орчимд хэлбэлзэж байна. Цаашид ханш өсөх төсөөлөл нь Холбооны нөөцийн банк бодлогын хүүгээ нэмэгдүүлэхээ удаа дараа хойшлуулж, алтны хөрөнгө оруулалтын эрэлт нэмэгдсэнтэй холбоотой гэж Монголбанк тайлбарлаж байгаа юм.