Гадны БАНКУУД Монголд орж ирвэл Ерөнхий сайд хэлснээсээ буцна

Монголд Bank of China-ийн салбар байгуулагдах асуудал дахин яригдаж эхэллээ. Хоёр, гурван жилийн өмнөөс тус асуудал хөндөгдөж, олон нийт болоод эдийн засагчдын зүгээс ихээхэн эсэргүүцэлтэй тулсан учир  “Bank of china” салбараа нээж чадалгүй 2013 оны нэгдүгээр сард Улаанбаатар хотноо төлөөлөгчийн газраа нээсэн билээ. Тэгвэл өнгөрсөн хугацаанд дотоод болон гадаадын компаниудаас 3 тэрбум  гаруй ам.долларын зээлийн хүсэлт хүлээн авчээ.

Энэ тухай Ерөнхий сайд Ж.Эрдэнэбат хэлэхдээ "Өнөөдрийн байдлаар Монгол Улсад салбараа нээгээд, үйл ажиллагаагаа явуулах хүсэлтэй байгаа гадны дөрвөн банк байгаа. Одоогоор тэр дөрвийн нэрийг хэлэх боломжгүй. Тэдгээрийн нэг нь “Bank of china” юм. Бид  эдгээр банкуудыг судалж байгаа. Судалгаа тооцоогоо сайн хийж байгаад шийдвэрээ гаргана" хэмээн хэлж байсан хэдий ч өнөөдрийг хүртэл оруулж ирэх эсэх нь шийдэгдээгүй байна. 

Тэгвэл үүнтэй зэрэгцэн Монголбанк БОДЛОГЫН ХҮҮГЭЭ 10.5 хувиас 4.5 хувиар нэмэгдүүлж 15 ХУВЬ болгох шийдвэрийг гаргав. Энэ нь банкны секторт ашигтай ч харин бусад ААН, иргэдэд халтай шийдвэр байв. Тиймээс энэ цаг үед иргэдийн гол хүсэл нь гадны банкуудыг оруулж ирэхийг ихээхэн дэмжиж буй юм. Тухайлбал, гадны банк орж ирэх нь Монголчуудын болон дотоодын банкнуудын сүйрэл дампуурал биш. Харин ч банкууд шинээр сэтгэн өөрчлөгдөн эрүүлжиж, иргэдийн бизнес сэтгэхүй хөгжин сайжирч өөдлөн дэвжихийн эхлэл байх болно" хэмээн иргэд үзэж байгаа бол судлаачдын зүгээс эсрэг байр суурьтай байгаа юм. 

Тэд “Гадны банк орж ирвэл дотооддоо өрсөлдөөн бий болно. Цаашлаад дотоодын банкны мөнгөн дүнгийн хэмжээ, олгож буй зээлийн хувь хүүгийн хэмжээ, цаг хугацааны хувьд өрсөлдөх чадваргүй болно. Энэ бол манай эдийн засгийн дорой байдлыг ашиглаж буй хэлбэр"  гэж үзэж буй.

Аль ч орны эдийн зас­гийн гол бүрдэл нь банк. Эдийн засгийн  хүнд нөхцөлд  Монголын банкууд томоохон зээл олгож чадахаа байсан учир гадны банкууд үүнийг орлох юм гэнэ. Тэгэхээр жижиг, бичил зээлүүд хүссэн хүсээгүй “Bank of China” руу шилжинэ гэсэн үг. 

Ерөнхий сайд Ж.Эрдэнэбат Сангийн сайд байхдаа "Гадны банк орж ирвэл арилжааны банкуудад дарамт болно. Цаашлаад арай гэж үйл ажиллагаа явуулж байсан банкуудыг сөхрүүлж магадгүй. Үүний оронд Монголын төр нэгдсэн бодлогоор банкны хүүг багасгах тогтолцоог зохицуулах нь илүү оновчтой" гэж хэлж байсан.

Тэгвэл өнөөдөр "Bank of china”-аас гадна гадны гурван ч банкны хүсэлтийг хүлээн зөвшөөрч магадгүй болоод байна.