Өнгөрсөн сард 672 зээлдэгч шинээр ипотекийн зээлд хамрагджээ

Өнгөрсөн аравдугаар сарын банкуудын ипотекийн зээлийн тайланг Монголбанкнаас  гаргажээ. 

Тайлант сард нийт 672 зээлдэгч шинээр ипотекийн зээлд хамрагдсанаас 419 зээлдэгч “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээлд, 253 зээлдэгч банкны өөрийн эх үүсвэрийн зээлд хамрагдсан байна.

Шинээр олгосон зээл өмнөх сараас 31.9%- иар буурч, төлөгдсөн зээл 8.3%-иар өссөн байна. 

2016 оны 10 дугаар сарын байдлаар банкуудын ипотекийн зээлийн үлдэгдлийн 76.8 хувийг Улаанбаатар хотод, 23.2 хувийг хөдөө орон нутагт олгосон ипотекийн зээл бүрдүүлжээ. Хөдөө орон нутаг дахь ипотекийн зээлийн үлдэгдлийн 14.1 хувь буюу 129.0 тэрбум төгрөг Орхон аймагт, 13.9 хувь буюу 127.1 тэрбум төгрөг Дархан-Уул аймагт, 8.7 хувь буюу 79.7 тэрбум төгрөг Дорноговь аймагт ногдож байна.

Б.Алтжин