Дорнод: Нийтийн тээврийн гурван чиглэл нэмнэ

Аймгийн Засаг даргын 2017 оны А/23 дугаар захирамжийн дагуу ахмад настан, хөгжлийн бэрхшээлтэй иргэдийг аймгийн төвийн нийтийн тээврийн хэрэгслээр үнэ төлбөргүй зорчих чиглэлийг нэмж тогтоох аймгийн Засаг даргын орлогч Ш.Ёл даргатай ажлын хэсэг томилогдон ажиллаж байна.  Ажлын хэсгийн бүрэлдэхүүн /2017.02.01/ шинээр нэмэх нийтийн тээврийн чиглэлийн дагуу газар дээр нь явж судлан үзэж танилцлаа. 

Ахмад настан болон хөгжлийн бэрхшээлтэй иргэд хуучин Танк – Бунхны малчин хороолол, Төмөр зам – Музейн чиглэл, 10-р баг Аривжих дэлгүүр – 2-р баг 54 дүгээр дэлгүүр гэсэн гурван чиглэлд нийтийн тээврээр зорчдог байсан. Тэгвэл нийтийн тээврийн чиглэлийг нэмэх талаар ирүүлсэн иргэдийн санал, хүсэлтийг харгалзан үзэж, 1-р баг Силикат – Музей, 4-р баг Өвөр-Эрээн – Танк, Шүр зах – 5-р баг гэсэн гурван чиглэлийг нэмэхээр урьдчилсан байдлаар тогтоожээ. Тус чиглэлүүдийн буудал, зогсоол, маршрут зэргийг тухайн багийн иргэдийн саналыг үндэслэн сургууль, цэцэрлэг, өрхийн эмнэлэг зэрэг үйлчилгээний газруудад ойр байхаар төлөвлөн ажиллаж байна.

Шинээр нийтийн тээврийн дээрх гурван чиглэл нэмэгдсэнээр ахмад настан, хөгжлийн бэрхшээлтэй иргэд нийт зургаан чиглэлд үнэ төлбөргүй зорчих боломжтой болох юм.