Орост сурдаг монгол оюутан хүүхдээ төрүүлээд хөнөөжээ

Энэ сарын 3-ны өглөө Улаан-Үд хотын нэгэн дээд сургуулийн дотуур байрны 00 өрөөнд 17 настай Монголын эмэгтэй оюутан ухаан алдсан байдалтай олджээ.

Түүний дор нь амьгүй болсон шинэ төрсөн хүүхэд нь байжээ. Энэ хэрэгт ОХУ-ын Эрүүгийн хуулийн 106 дугаар зүйл “Төрүүлсэн хүүхдээ эх нь хөнөөх” гэдэг зүйл ангиар эрүү үүсгэн шалгаж байна гэж Оросын Мөрдөн байцаах хорооны Буриадын Мөрдөн байцаах газар мэдээллээ.

Мөрдөн байцаалтын мэдээгээр, дээрх оюутан 2016 оны намар Монголоос Буриадад ирээд нэгэн дээд сургуульд элсэн орсон бөгөөд дотуур байранд монгол оюутнуудын хамтаар амьдардаг байжээ. Тэрбээр орос хэл мэддэггүй, Буриадад монгол оюутнуудаас өөр хүмүүстэй харьцдаггүй байсан аж.

Өрөөнд нь хамт амьдардаг оюутнууд, багш нар, тус сургуулийн бусад ажилтнууд түүнийг жирэмсэн гэдгийг нь мэддэггүй байсан, учир нь жирэмсэн гэх шинж тэмдэг анзаарагддаггүй байжээ.

5 дугаар сарын 3-ны өглөөний 4 цагт жирэмсэн оюутан өрөөнөөсөө гаран нойлд орон дотроос нь түгжээд тэндээ хүүхдээ төрүүлжээ.  

Үүнээс хойш нэг цагийн дараа дотуур байрны жижүүр байрны давхруудаа шалгаж яваад оюутны орсон нойлын өрөөний хаалган доогуур цус урссан байхыг олж харжээ. Тэгээд нойлын хаалгыг нь эвдэн ороход дотор нь ухаан алдан унасан оюутан, түүний дор амьгүй болсон хүүхэд нь байжээ.

Оюутныг тэр даруй эмнэлэгт хүргэж, эмч нар түүний амийг нь аврахаар ажиллаж байгаа талаар баттай эх сурвалж мэдээлжээ.