Шударгын туйл Ц.Нямдорж гишүүн “ком”-оос гарлаа

Удаан хугацааны турш ужигран яригдаж буй “60 тэрбумын хэрэг” гэгч ид эрчтэй яригдан, МАН дотор ч “бөмбөг тэсрээд” эхэллээ. Уг хэргийн гол оролцогчдын зүгээс нотлох баримт болох бичлэгийг “эвлүүлэг” хэмээн өнөөг хүртэл зад гүрийсээр байгаа боловч мөдхөн хэлэх үггүй болж мэдэх нь.

Шударга бус зүйлийг шулуухан хэлчихдэгээрээ алдартай Ц.Нямдорж гишүүн эцэст нь энэ хэргийн талаар өөрийн байр суурийг илэрхийлсэн явдал “гал дээр шар тос нэмэв” гэгч болов. Нямка гишүүнийг энэ талаар үг дуугардаггүй юм байх даа хэмээн олон нийт удаан хугацаанд хүлээж байсан нь гарцаагүй. Өмнө нь яагаад таг дуугүй байгаад байсан юм бол хэмээн хардах нэгэн ч байна.

Ер нь, Монгол улсын Ерөнхийлөгчийн сонгуульд АН-аас нэр дэвшсэн Х.Баттулга ялж, төрийн шинэ тэргүүн болсон явдал МАНАН хэмээх бүлэглэлд хүчтэй цохилт болсон нь сүүлийн үед өрнөөд буй улстөрийн үйл явдлуудаас тодорхой харагдаж байна. Үе улиран төр засгийн эрх мэдлийн дээд сэнтийд өөрийн төлөөллөө тавьж дөнгөдөг байсан энэхүү бүлэглэл энэ удаад ялагдан, тэдний хүчтэй “дайсан” Төрийн тэргүүн болсон нь ийнхүү олон хүний дотроо бугшуулан хадгалж байсан үгсийг нээгээд эхлэв бололтой.

Ц.Нямдорж гишүүний үг нийгэмд жинтэй тусдагийг бүгд мэднэ. Тэр бол ямар ч реклам сурталчилгаа хэрэглэлгүй, өөрийн гэсэн шударга имижээрээ УИХ-д удаа дараалан түвэггүй сонгогдсоор ирсэн. Олон нийт түүнийг ингэж л үнэлдэг юм. Дээд түвшний эрхтэн дархтнуудад хаягласан шүүмжлэлийг айж эмээх сэтгэлгүйгээр тэр л шууд хэлж чаддаг. Энэ бүгдийг нотлох өчнөөн тооны бичлэг интернет орчинд байгааг бид харсан, сонссон.

“60 тэрбумын хэрэг”-ийн бичлэг бол эвлүүлэг биш гэдгийг Ц.Нямдорж гишүүн баттай ноттойгоор мэдэгдэв. Монголын урдаа барьдаг туршлагатай мундаг хуульчдын нэг ийнхүү өгүүлсэн нь яавч гоомой үгс биш байх. Тэгээд ч УИХ-ын гишүүн асан Ц.Оюунгэрэлийн дэмжлэгтэйгээр уг бичлэгийг өмнө нь Олон улсын шилдэг лабораторид илгээн шинжлүүлэхэд эвлүүлэг биш гэдэг нь тогтоогдсон билээ. Тэрхүү байгууллага бол мэдээж гадны ямар ч нөлөөгүй, гуравдагч тал учраас дүгнэлт нь шударга гэдэгт эргэлзэх зүйлгүй юм.

Энэхүү бичлэг анх тавигдсаны дараахан бараг гурав хоногийн турш “ком”-д ороод, хэлэх үггүй болсон тухайгаа Ц.Нямдорж гишүүн бас дурдав. Ингээд намын дарга М.Энхболдод өөрийн зүгээс зөвлөгөө өгөхөд тэрээр хүлээн авч хэрэгжүүлээгүй талаар ярин, бичлэгийн гол баатар Ганбаатарын эрүүл эсэхэд эргэлзэж буйгаа илэрхийлсэн юм.

Монголын хууль хүчний байгууллагууд экс Ерөнхийлөгч Ц.Элбэгдоржийн үед бүр хөл толгойгоо олохоо байтлаа самруулсан хэмээн нэртэй хуульчийн хувьд дүгнэдэг аж. Үнэхээр ч Шүүхийн Ерөнхий Зөвлөлийн даргаар хүн амины хэрэгтэн Лүндэндоржийг тавьсан шүү хэмээн нэгэн удаагийн хуралдаан дээр Элбэгээ ерөнхийлөгч рүү хандан ширүүлж байсныг тод санаж байна. Олон нийтийн дунд ч тэр даргын талаар иймэрхүү явган яриа байнга сонсогддог юм билээ.

Ц.Нямдорж гишүүний үзэж буйгаар, МАН-ын нэр хүндийг унагаасан зарим нөхдийг үтэр түргэн хөөн зайлуулах шаардлагатай аж. Энэ байдлаараа ужиграад заваараад явбал 2020 оны сонгуульд бүгд гудамжинд гарах магадлалтай талаар УИХ-ын мэргэшсэн гишүүн, туршлагатай хуульч өгүүлж байгаа нь зүгээр ч нэг чихнийхээ хажуугаар өнгөрөөчих үгс биш шүү...

Д.Мигаа