Барилгын салбарыг багалзуурдуулахгүй сайд Х.Баделхан

Үндэсний цөөнхийн төлөөлөл болсон Сайд

Монголын үе үеийн төр үндэсний цөөнх болсон казах түмэнд хүндэтгэлтэй хандаж  ирсэн. Эл уламжлал үргэлжилж  Баян-Өлгий аймгаас хоёр дахь удаагаа УИХ-ын гишүүнээр сонгогдсон Х.Баделханд Монгол Улсын барилгын салбарыг  итгэж, найдан даатгаж, Засгийн газрын гишүүн Барилга, хот, байгуулалтын сайдаар томилов. Хүрэлсүхийн танхим үндэсний цөөнхийн төлөөллийн Сайдтай боллоо.  Бас л онцлог өнгө төрх юм. Дэлхийн улс орнуудад  амьдардаг казакуудаас соёл, өв уламжлалаа хамгийн сайн хадгалж үлдсэн нь Монгол дахь казахууд гэдэг. “ Энэ бүхэн үндэсний цөөнхийн талаар зөв бодлого явуулсан Монгол төрийн ухаан”  хэмээн ярьдаг эрхэм Барилгын салбарыг толгойлж байна. Баян-Өлгий аймгийн Засаг даргаар ажиллаж, Аж үйлдвэрийн дэд сайдаар томилогдсон,  аж ахуйн салбарт голдуу ажиллаж ирсэн түүний туршлагад найдсан болов уу. Тэр Барилга, хот байгуулалтын сайд Х.Баделхан гэж дуудуулна. Монгол Улсын их сургуулийг авто инженер мэргэжлээр төгсөөд Улаанбаатар хотын автобус баазад инженерээр ажлын гараагаа эхэлсэн. Хоёр жилийн дараа төрөлх нутагтаа томилолт өвөртлөн  очсон. Х.Баделхан төрөлх нутгийн түмнээсээ төрийн түшээгийн томилолтыг хоёронтаа халаасласан улстөрч.УИХ-ын чуулганы хуралдааны үеэр түүнийг үг, дуу цөөнтэй хэмээх шүүмжлэл дагадаг. Харин түүний толгойлох барилгын салбар хэл ам таталдаг хэцүүдээд ирэхээрээ улс орныхоо эдийн засагт ч нөлөөлж мэднэ. Хүндхэн салбар.  Гэр хорооллын дахин төлөвлөлтийг төгөлдөржүүлэх, ахмадуудын орон  сууц, Ипотекийн зээл, түрээсийн орон сууц. Түүний өмнө  шил дараалсан олон ажил, шийдэл гаргахыг хүлээж байна. Энэ салбарт инженер хүний ур ухаан, эдийн засагчийн нарийн тооцоолол илүүдэхгүй.

Барилгын салбарын хүнд суртлыг арилгана

Барилга, хот байгуулалтын сайд Х.Баделхан барилгын салбарт хүнд суртал  байгааг хүлээн  зөвшөөрсөн нь оргил үедээ 200-300 даргын гарын үсэг шаарддаг байсан хүнд суртлыг  бүр мөсөн арилгах нь гэж ойлгогдоно. Бас  өмнөх Сайдын хийж байсан сайн ажлыг улам чамбайруулах байх. Улаанбаатар утаа, агаарын бохирдол эхэлсэн нь зөвхөн эрүүл мэндийн биш  бас Барилга, хот байгуулалтын сайдын чихнээс хонх уядаг. Үнэндээ бол гэр хорооллын 200 мянга шахам өрхийг орон сууцуулж баймааж утаанаас сална. Инженерийн шугам сүлжээг хоёр  тэрбум юанийн буцалтгүй тусламжаар хийхээр төсөл бэлэн болсон. Нийт 50 бичил төв баригдахаас ирэх жилдээ хоёр төвийг ашиглалтад оруулахаар төлөвлөсөн зэрэг нааштай үр дүн, сайн мэдээ Сайдын суудалтай хамт ирсэн юм. Х.Баделханы өмнө зөвхөн баянөлгийчүүдийн биш Улаанбаатарчуудын өмнө тулгамдсан барилга хот байгуулалт, инженерийн шугам сүлжээ, төлөвлөлт зохион байгуулалт. Олон нийтийн ялангуяа залуу гэр бүлийн анхааралд байдаг орон сууцны Ипотекийн зээл. Асуулт нэхсэн  хариултууд хүлээж байна. Хотоор зогсохгүй аймгуудын төвүүдэд орон сууцны хорооллууд баригдаж байгаа нь авууштай.  Орон нутгийн иргэд Улаанбаатарчуудаас дутахгүй тохилог орчинд амьдарна.  Ийм болгоход учрах хүндрэлийг арилгах, иргэдэд ээлтэй болгох шийдвэр гаргах үүргийг салбарын сайд Х.Баделхан хүлээж байна. Улаанбаатар хотын төв цэвэрлэх байгууламжийн элэгдэл. Түүнээс гарах үнэр хотын баруун хэсгийн оршин суугчдыг тавгүйтүүлдэг. Зуны улиралд хаалга, цонхоо онгойлгож чадахгүй хүнд нөхцөлд амьдарна. Энэ бүхэн хариулт нэхсээр.  Их уулсын дунд өссөн Баделхан их хотын, Монголын барилгын салбарын асуудлыг шийдвэрлэхээр Засгийн газрын танхимын гишүүн болов.Гавьяат эдийн засагч Х.Баделханыг барилгын салбарт гавьяа байгуулахаар ирсэн гэсэн хүлээлт үүссэн ч байж мэднэ. Аймаг удирдаж, УИХ-д хоёр удаа сонгогдож, яамны дэд сайд хийсэн түүний мэдлэг, туршлага, ур чадварт эргэлзэх хэрэггүй болов уу. Барилгын салбарыг багалзуурдуулахгүй сайд, УИХ-ын гишүүн Х.Баделханы тухай товчхон өгүүлэхэд ийм байна.

А.Эрдэнэ

www.zindaa.mn