Дөрвөн Ерөнхийлөгч 51 удаа хориг тавихад Сайд өртөөгүй

Сүүлийн өдрүүдэд Ерөнхийлөгчийн хориг анхаарал татаж байна. Өмнөх Ерөнхийлөгч нар нь хориг тавихыг үзээгүй юм шиг  хүлээж авч буй нь хориглосон асуудал нь дуулиантай болоод тэр болов уу.

Сангийн сайдаар Ч.Хүрэлбаатарыг томилохыг эсэргүүцсэн ХОРИГ шинэхэн Ерөнхийлөгчийн анхны хориг байв.  Сангийн сайд нь Увсаас сонгогдсон Хүрэлбаатар. Ерөнхийлөгчийн Тамгын газрын дарга нь хэдэр  ааштайгаараа зартай З.Энхболд. Энэ бүхэн хоршоод Ерөнхийлөгчийн ХОРИГ-ийг сонирхолтой дуулиантай болгож байна. Даарин дээр давс гэгчээр МАН-ын бүлэг хоёр хуваагдсан. Түүнээс биш Ерөнхийлөгчийн хориг байдаг л зүйл.

2017 оны төсвийн тодотгол дээр яамны Төрийн нарийн бичгийн даргаас доош албан тушаалтан, албан хаагчдад 300 мянган төгрөг тэгшитгэж урамшуулал хэлбэрээр олгох 55.4 тэрбум төгрөгийн зарцуулалт дээр Ерөнхийлөгч хориг тавьсан. УИХ-ын 65-ын бүлэг Хүрэлбаатарын “хориг”-ийг хэлэлцэх үеийнх шиг хагаралдаж, чи би-дээ тулахгүй бол Ерөнхийлөгчийн хориг “ЗОВЛОН” биш. Хоног алдуулж байгаа нь л таагүй.

 1993-2013 оны хооронд Монгол Улсын Ерөнхийлөгчөөр сонгогдсон эрхмүүд 51 удаа хориг тавьсан байх юм. Анхны Ерөнхийлөгч П.Очирбат долоон хориг тавьснаас хэсэгчилсэн тав, хуульд бүхэлд нь хоёр хориг тавьж байжээ. Тухайн үеийн парламент гурван хоригийг нь хүлээн авсан байна.  

Найман жил Ерөнхийлөгчийн албыг хашсан Нацагийн Багабанди 30  удаа хориг тавьснаас 20 нь хэсэгчилсэн 10 нь хуульд бүхэлд нь тавьсан хориг байв. Үүнээс УИХ 10 хоригийг хүлээн аваагүй байна.

Монгол Улсын гуравдахь Ерөнхийлөгч хэмээн өөрийгөө бичүүлж, хэлүүлэх дуртай Н.Энхбаяр дөрвөн жилийн хугацаанд есөн удаа хориг тавьснаас долоог нь тухайн үеийн УИХ хүлээн авчээ. Цахиагийн Элбэгдорж 2009-2013 оны хооронд таван хориг тавьсны гурав нь хэсэгчилсэн, нэг нь  хуульд бүхэлд нь тавьсан хориг байв.

Эдгээр Ерөнхийлөгч нар шинэхэн Ерөнхийлөгчөөс ялгаатай нь Сайдын томилогоонд хориг тавиагүй аж. Тэгэхээр тав дахь Ерөнхийлөгчийн тавьсан хориг Сайдад гэдгээрээ анхдагч болох нь.

Дөрвөн Ерөнхийлөгчийн 20 жилийн хугацаанд тавьсан 51  хоригийн  34 нь хэсэгчилсэн, 17 нь хуульд бүхэлд нь тавьсан хориг байжээ. Тухайн үеийн парламентууд нийт хоригуудаас 34 хоригийг хүлээн авсан байх юм.

МАН-ын бүлэг 65-уулаа байгаа нөхцөлд Ерөнхийлөгчийн ХОРИГ-оос сүрдээд байх зүйл алга гэж харагдана. Хуулийнхаа хүрээнд хэлэлцээд тийм, үгүй гээд явчих боломжтой. Харин Ерөнхийлөгчийн ХОРИГ-оос илүүтэй Ерөнхийлөгчийн Тамгын газрын ДАРГА-аас нь жийрхээд, 65-ын бүлэг нь хуваагдаад байвал асуудал хүндэрнэ гэсэн үг.  Ерөнхийлөгчийн талд ашигтайгаар шийдэгдэнэ.

А.Эрдэнэ

www.zindaa.mn