Т.Дамдинсүрэн: Харамсалтай байна, Ерөнхийлөгчид хандана

2015 оны 11 дүгээр сарын 28-ны өдрийн 18.00 цагийн үед нийслэлийн Баянгол дүүргийн 12 дугаар хорооны нутаг дэвсгэрт хүний амь хохирсон, хүн гэмтсэн хэрэг гарсан. Улсын дээд шүүхээс Буяннэмэхийг аргагүй хамгаалалт хийсэн гэж үзэж цагаатгалаа. Талийгаач П-гийн ээж Т.Дамдинсүрэнгээс үйл явдлын талаар тодруулсаныг хүргэж байна.

-Та Дээд шүүхийн шийдвэрийн тухайд юу хэлэх вэ?  

-Харамсалтай байна. Улсын Дээд шүүх хүн амины онц ноцтой ээдрээтэй гэмт хэргийг цагаатгаж, хэрэгсэхгүй болголоо. Дээд шүүхийн Эрүүгийн танхимын шүүгчдийг ийм шийдвэр гаргана гэж арай бодсонгүй. Шүүхийн байгууллагад олон жил ажилласан хүмүүс нэгэндээ халддаггүй, шүүгч  шүүгчийнхээ шийдвэрийг буруутгаддаггүй юм байна гэсэн бодол л төрлөө. Анхан, дунд, дээд шат адилхан. Улсын дээд шүүхээс нэг удаа хэргийг буцаасан. Хоёрдахь удаагаа ороод Буяннэмэхийг цагаатгалаа.

-Прокурор анх Эрүүгийн хуулийн ямар зүйл ангиар зүйлчилсэн  юм бэ?

- Эрүүгийн хуулийн 91.1-ээр хүний амь насыг санаатай хөнөөсөн гэж зүйлчилсэн. Буяннэмэхийг батлан даалтад гарсаны дараа зүйл анги өөрчлөгдөөд явсан байдаг.

-Улсын дээд шүүхээс шийдвэр гарсаны дараа юу болсон юм бэ?

-Мэдээж хэрэг шүүхийн шийдвэрт би бухимдсан.  Буяннэмэх рүү үг хэлсэн.Биед нь халдаагүй. Тэр олуулаа явдаг.

-Дээд шүүхээс ямар шалтгаанаар буцаж байв?

-Анхан, дунд шатны шийдвэрийг буруу ийм, ийм зүйлийг тодруул гэсэн. Мөрдөн байцаагч Уламбаярыг солиод шинэ мөрдөн байцаагчид шилжүүлсэн. Надаас нэмж өгөх баримт байна уу гэж асуугаад прокурорт шилжүүлсэн. Прокурор бол 91.1-ээр зүйлчилсэнийг шүүгч хүчингүй болгоод яваад байсан.  

-Цагаатгагдсан хүн миний хоёр сая төгрөгийг авахын тулд гэсэн байдаг?

-Тийм зүйл байхгүй. Дэлгүүрт миний хүүг утсаар ярихад хараад хүлээгээд зогсоод байгаа үеийн бичлэг бий. Хавтаст хэрэгт хавсрагдсан бичлэг, нотлох баримтуудыг би олон нийтэд ил болгоно. Дэлгүүрээс цуг гарсанаас хойш барьцаалан зээлдүүлэх газраас гар утсыг авч өгнө гээд 16.00 цаг өнгөрч байх үед ХААН банкны салбараас хоёр сая төгрөг авсан байдаг. Дансанд нь найман сая орчим төгрөг байсан юм билээ.  Замын цагдаа дээр очих үед Буяннэмэхээс хоёр сая 100 мянган төгрөг гарч ирсэн. Хэрэг үдшийн 18.00 цагийн үед болсон. Би өөрөө эрхзүйч мэргэжилтэй хүн. Бүх зүйл баримт нотолгоотой.

-Хохирсон гээд байгаа хүний мэдүүлэг хоорондоо зөрдөг  гэсэн үү?

-Буяннэмэхийн мэдүүлгүүд анхныхаасаа зөрүүтэй байдаг. Өмгөөлөгч нь ганцаараа байсан, гэрчгүй учраас зохиож ярихыг зөвлөсөн байх магадлалтай. Гурван хавтастай хэрэг 700 гаруй хуудастай. Уламбаяр байцаагч Буяннэмэхийг хувийн компанийн захирал гэх байдлаар өөрт нь ашигтайгаар баримт бүрдүүлсэн. Хувийн компанигүй хувиараа таксины үйлчилгээнд явдаг “Приус-10” машинтай л хүн.  Ах дүү нар нь төрийн албанд ажилладаг би үнэхээр дийлэхгүй юм билээ. Тэд ч үүнийгээ харуулж чадлаа. Гэвч үнэнд гүйцэгдэх өдөр ирэх байлгүй.

- Талийгаач суралцдаг байсан гэл үү?

-Хүү минь суралцахын хажуугаар ажил хийдэг байсан.  Анхныхаа цалинг аваад ээж рүүгээ захиралдаа хэлээд шилжүүлсэн дансны хуулга нь хүртэл бий. 

-Гэмтлийн эмнэлэгт эхнэр хүүхдээ үзүүлэхээр очоод Буяннэмэх гарсан гэдэг?

-Гэмтэл биш. Эх нялхсын эрүүл мэндийн үндэсний төв. Эхнэр, хүүхдээ дагуулж эмнэлэгт очоод улавч авахаар гарсан байдаг. Буяннэмэхийн араас 18 удаа эхнэр нь залгахад утсаа аваагүй. Эхнэр нь мэссж бичихэд би ажилтай байна. Дэлгүүрт ороод байжээ гэсэн байдаг.  Дуудаад байхад эргэж очоогүй эсвэл эхнэр, хүүхдээ дагуулаад явж болоогүй юу гээд ээдрээтэй зүйл олон. Энэ бүхэн Буяннэмэхийн яриа.

-Та Ерөнхийлөгчид хандах уу?

- Ерөнхийлөгчийн зөвлөхтэй уулзахаар болсон. Надад ард түмэндээ хандахаас өөр арга байхгүй. Буяннэмэхэд бол танил тал, ах, дүү гээд бий. Ерөнхийлөгчтэй ч уулзана. Цаашид зөвхөн миний хүүгээр зогсохгүй ийм үйлдлүүд гараад, ингээд хохироод хэлмэгдээд явах вий. Би үүнээс айж байна. Тиймээс тууштай л тэмцэнэ.

-Тантай уулзсан уу. Эвгүй зүйл боллоо уучлаарай ч гэдэг юм уу?

- 19 настай хүүхдийг алчихлаа гэж би хэлнэ. Гаж донтон  ч юм бил үү. Манай хүү их царайлаг.  Юун уучлал гуйх вэ. Би өөрөө хохирогч. Сэтгэлзүйгээр хохирч байна гэсэн зүйл ярина. Намайг доромжлолоо энэ хүнийг Зөрчлийн хуулиар шийтгэ ухааны зүйл хэлнэ. Миний хүүгээс 10 гаруй насаар ах хүн.

-Танай хүү бие бялдарын хувьд ямархуу хүүхэд байв?  

-Яаж ч бодсон миний хүү дийлэхгүй. Ангийнхан дотроо биеэр жижиг, 40 кг  гаруйхан  жинтэй тийм л хүүхэд шүү дээ.

- Хутга хэнийх вэ гэсэн асуулт хариултгүй бололтой байдаг?

-Хэнийхийг нь тогтоогоогүй. Хамгийн сүүлд Буяннэмэхийн суудлын урд дороос олдсон. Хутганы ирэн дээрх цусны бүлэг Буянэмэхийнхтэй таардаг.  Тэр Гэмтлийн эмнэлэгт 5-6 хоног хэвтсэн. Сэхээнд байгаа гэсэн ч энгийн тасагт “Машины осолд ороод ирсэн” гээд байсан тухай нэг сувилагч нь надад хэлсэн юм.  Намайг очиж уулзсаны дараа буюу шөнө харж байсан цагдаа нь алдчихсан. Би маргааш нь гомдол гаргаад, цагдаагийнхан 461- дүгээр ангид саатуулахаар авч очиход Хорихын эмнэлэгт хэвтүүлсэн байсан. Хорихоос батлан даалтаар гараад дахин эмнэлэгт хэвтэх гэхэд нь   хэдэн жилийн өмнө нурууны хагалгаанд орсон юм байна. Одоо зүгээр гээд хүлээж аваагүй байдаг.  Ийм л өрнөлтэй хэрэг. Үнэний төлөө олон түмэндээ л хандана.

А.Эрдэнэ

www.zindaa.mn