О.Баасанхүүд Хурцыг өмөөрөх ямар шалтгаан байна вэ?

УИХ-ын гишүүн О.Баасанхүү чуулганы нэгдсэн хуралдаанаар хэлэлцсэн хуулийн төсөл, асуудал бүрээр асуулт, асууж байдаг. Түүнд мэдэхгүй зүйл, оролцохгүй салбар гэж үгүй. Ер нь, гишүүдийн ерөнхий дүр төрх бол  мань эр л дээ. Мэдэмхийрдэг.  Баасанхүүг Хурцаас хамгаалалт авсан гэж байв. Үнэн бол Батзандан, Баасанхүү хоёрт нэг зоосны хоёр тал шиг адилхан зүйл гарч ирнэ. Баасанхүү Хурцаас хамгаалалт хүссэн бол Батзандан Хурцаас айж төрөөс хамгаалалт хүслээ.

Баасанхүүд Хурцыг өмөөрөх ямар шалтгаан байна вэ. Одоо Хурц эрх мэдэл, албан тушаалгүй, Баасанхүү эсрэгээрээ байгаа. Судлаач Д.Ганхуяг , Канадын Элчин сайд УИХ-ын даргатай уулзах хүсэлт тавьжээ. Гэвч З.Энхболдод үнэхээр зав байсангүй.  
Ингээд  Баасанхүүтэй уулз гэжээ. Хууль зүйн байнгын хорооны хурал, Баасанхүүгийн уулзалт хоёр давхцаж орхиж. Уулзалт дөнгөж эхэлж байхад О.Баасанхүүгийн утас дуугарч Боловсрол, соёл, шинжлэх ухааны дэд сайд Б.Тулга утсаар ярьж  “Чи төлбөрөө хий л дээ, хуралдаа очихгүй юугаа хийгээд байгаа юм” гэсэн шүү юм ярьжээ. Гэтэл уулзалтад нь Б.Тулга дайраад ороод ирж. Удалгүй  Н.Энхбаяр хаалгыг нь өшиглөөд ороод иржээ. Канадын Элчин сайд асныг “Яв, чи” гэж.

О.Баасанхүү Б.Тулгаас холдоод өрөөндөө ормогцоо Хурц руу утасдаж хамгаалалт хүссэн байна. Хурц хүсэлтийг шуурхай шийдэж хоёр хамгаалагч томилжээ" хэмээн дурджээ.

 Энхбаяр намынхаа нэрээр Сайд болсон, УИХ-ын гишүүд байсан нөхдөөс мөнгө нэхдэг, үүрэгддэг байсан нь Эрүүл мэндийн сайд асан Г.Шийлэгдамбын 500 сая төгрөгийн авлигын хэргээр нотлогдсон билээ. Энхбаяр, Тулга нарын дарамтад орсон Баасанхүү гишүүн Хурцаас хамгаалалт хүссэн болж таарлаа.  Энхбаяр, Баасанхүү хоёр одоо ч хөндий харьцаатай байгаа.  Намаа шинэчилнэ гэж яриад хөөгдөх, туугдахдаа тулав.

Хурцыг Элчингээр томилох эсэхийг хэлэлцэх үед    О.Баасанхүү:  “Нийтийн сонсголыг зохион байгуулах ажлын хэсэг  байгуулагдсан боловч хуралдаагүй.   Гэтэл энд өдөр судраа товлочихсон мэт яриад байх юм. Эсвэл надад хэлээгүй юм уу.

Миний ойлгож байгаагаар цэрэг, генерал хэн нэгнээс тушаал аваад бусдын өмнөөс янз бүрийн шийдвэр гаргасан байж болно. Байнгын хорооны хуралдаанаар Л.Болд гишүүнтэй холбоотой ноцтой хоёр баримт ярьсан” гэлээ. Аюулгүй байдал, гадаад бодлогын байнгын хорооны хуралдааны үеэр Хурцыг Элчин сайдаар томилохыг дэмжсэн гишүүдийн тэргүүнд Баасанхүү байсан. О.Содбилэг, Л.Болд, Т.Аюурсайхан гурав байнгын хорооны тухайн хурлын санал хураалтын үед “эсэргүүн” болсон юм.

Хурцын томилгоог хамгийн их эсэргүүцдэг Батзандан ч дуугүй суусангүй. “Энэ томилгооны нийтийн сонсголыг явуулахгүй гэж нэлээдгүй гишүүд эсэргүүцэж байгаа. Ялангуяа Баасанхүү гишүүн Хурцыг их өмгөөлж байна. Баасанхүү шиг баасын үгээр явахгүй. Хурцын машины хонины хонхорт явдаг хүний үгийг битгий тоо. Энэ асуудлаар нийтийн сонсгол хийх хэрэгтэй” гэж уурслаа. Батзандангийн хэлсэн  үгнээс харахад судлаачийн бичсэн үнэний ортой ч юм шиг.

Төрийн нууцыг хадгалах биш байнгын хорооны хуралдаан дээр ил ярьж, “Цааш нь ярьчих уу, яах уу, гишүүд ээ” хэмээн даапаалж, даажинтайяа жуумалзаж, инээдээ барьж ядан байсан Хурцыг өмөөрөх өөр ямар шалтгаан Баасанхүү гишүүнд байна вэ. Хурцыг одоо өмөөрч, сүүлдээ “өмгөөлөх” хэрэг гарна гэж тооцсон уу, Баасанхүү гишүүн. Инээснийг асуу гэдэг. Инээгээд байгаа Хурцаас яагаад инээсний цаад шалтгааныг, учрыг нийтийн нээлттэй сонсголоор олон нийтэд ил болгочих байсан. Гэвч парламент дэмжээгүй. Түүнийг УИХ-ын гишүүний халдашгүй байдалд халдсан, гүтгэсэн гэж авч хэлэлцэхээр болж байна.  Хууль барих төрийн дээд байгууллагын төлөөлөл, УИХ-ын гишүүн хүн ямар шалтгаанаар Хурцын машинд суугаад явж байх вэ. Үнэхээр Хурцын машинд сууж явдаг байсан эсэхийгээ Баасанхүү, Батзандан гишүүнд тайлбарлах ч юм бил үү.

 А.Эрдэнэ

www.zindaa.mn