Үйлээ үзэж буй Н.Энхбаяр

Анх бууриа засахдаа л буруу газар хана шийрлэсэн байх. Өдгөөгөөс арваад жилийн өмнө улс төрийн ууган хүчин нэрээ өөрчилж, МАХН-ыг МАН-аар сольсон цагаас хойш Н.Энхбаяр тэргүүтэй нөхөд ууган хүчний голж орхисон нэрийг авахаар хөөцөлдсөн нь тийм ч амар бүтээгүй. Шат шатны шүүхээр урт хугацаанд хэлцэгдэж байж сая нэг МАХН нэрийг өөрийн болгож авсан ч намын дарга Н.Энхбаярт эрүү үүсгэн улмаар ялласан.

Хорих ялаар шийтгүүлсэн намын дарга Н.Энхбаяр тодорхой хугацаанд шийтгэлээ хүлээгээд суллагдсан ч өнгөрөгч 2017 оны долдугаар сарын 1 хүртэл улс төрийн болон төрийн сонгуульт ажилд томилогдох эрхгүй байсан. Харин бүх шатны сонгууль дууссаны дараа Н.Энхбаярын улс төрийн болон төрийн албан тушаал эрхлэх эрх нь нээгдсэн цагаас эхлэн О.Баасанхүү олон жилийн туршид МАХН-ын Их хурлыг хийлгээгүй, дүрмийн шинэчлэл хийх хэрэгтэй хэмээн гишүүдийг нь хоёр хуваан Төрийн ордноо хурал хийсэн. Ингэхдээ өөрийгөө даргаар өргөмжилсөн билээ. Харин Н.Энхбаяр, ахиад Улсын дээд шүүхэд зарга үүсгэж МАХН-ын даргаар хэвээр үлдсэн юм. Гэтэл өнөөдөр МАХН-ын дүрмийн шинэчлэл, мөрийн хөтөлбөрийг бусад асуудлыг Улсын дээд шүүхээс бүртгэж авахаас татгалзсан хэвээр байна. Түүнд дурдахдаа “Улс төрийн намын тухай хууль болон уг намын дүрэмд заасан шаардлагаа зөрчсөн” гэж үзжээ.

Н.Энхбаярыг их улс төрөөс зайлуулах ажиллагаа 2009 оны Ерөнхийлөгчийн сонгуульд өрсөлдөх үеэс эхэлж амжилттай хэрэгжиж өдгөө арав дахь жилтэйгээ золгох гэж байна. Өнөөдөр ч ийнхүү Дээд шүүхээс “Дүрэмд заасан шаардлагаа зөрчсөн” гэх мэт өчүүхэн шалтаг тоочиж байгаагийн цаана Н.Энхбаяртай хийж буй бүлэглэлийн дайн үргэлжилж байна гэсэн үг. Яасан ч үйлтэй Н.Энхбаяр, МАХН вэ.  

Өчигдөр гэхэд МАХН-ын дэд дарга С.Ганбаатар “Улс төрийн хүчнүүд нийлж ядуурал, ажилгүйдэл, уул уурхайн баялагаас ашиг шим хүртэж чадахгүй байгаа зэрэг Монгол оронд тулгамдаж байгаа нөхцөл байдлыг өөрчлөхийн төлөө, шинэ дээд Үндсэн хуулийг батлуулахын төлөө, ард иргэдээрээ дэмжүүлэхийн төлөө хамтран ажиллах болно” хэмээн хэвлэлийн хурал зарлаж байгаагийн цаана аанай л бүлэглэлд хандсан өчүүхэн улс төр. Тэд аргагүйдэж, Н.Энхбаярыг хүчгүйдүүлэх бүлэглэлийн өмнө хүчин мөхөсдөж байна. Бүлэглэлд мөнгө байна, эрх мэдэл байна, хэвлэл мэдээлэл гээд байхгүй зүйл үгүй учраас аргагүй хүчин мөхөсдөж байгааг бид олон жил харж сууна.

Тойрон хүрээлэгчид нь Н.Энхбаярт гарц хайж байна,  Шинэ дээд үндсэн хуулийг хүсч байгаагийн цаана ийм л санаа нуугдах бөгөөд үүнээс өөр арга зам алга.

Хэвлэлийн хурал хийх үеэр мөн намын дэд дарга Ц.Оюунбаатар “Дөрвөн намын гишүүд нэгдэн шинэ дээд үндсэн хуулийг дэмжих, тунхаглах арга хэмжээ маргааш болно. Монголчууд нэг зүгт харж, эвтэй найртай явахгүй бол хоёр хөршөөсөө хол хоцорч, эдийн засгийн ядуурлаас гарч чадахгүйд хүрч, ирээдүй маш бүрхэг байна. Иймд бид гарц харж улс төрийн намуудыг нэгдэхийг уриалж байгаа юм” гэв.гэж байгаа нь үүнтэй агаар нэгэн юм.

С.Ууганбаяр

www.zindaa.mn