Г.Баянбилэг: Тагнуулаас намайг хүртэл дуудаж байцаана гэж сүрдүүлсэн

Тагнуулын ерөнхий газрын дарга асан хошууч генерал Б.Хурц “С1” телевизийн “Цензургүй яриа” нэвтрүүлэгт оролцохдоо ТЕГ-ын Сөрөх тагнуулын газрын дарга асан хурандаа Д.Цогтбаатарыг Герман иргэний машин, гар утсыг хэрэглэж байсан мэтээр ярьсан. Хурандаа Д.Цогтбаатар түүнийг нэр төрд халдсан хэмээн  Хан-Уул дүүргийн Иргэний хэргийн анхан шатны шүүхэд Нэр төр сэргээлгэхээр нэхэмжлэх гаргажээ. Шүүх  хурал өнөөдөр болох байсан ч тодорхой шалтгааны улмаас хойшиллоо. Энэ талаар Д.Цогтбаатарын өмгөөлөгч Г.Баянбилэгээс зарим зүйлийг тодрууллаа.

-Шүүх бүрэлдэхүүн ямар шийдэлд хүрэв?

-Манай талаас шүүх хуралдааныг нээлттэй явуулах хүсэлт гаргасан. Хариуцагч талаас Б.Хурцын итгэмжлэгдсэн төлөөлөгч Санчирбал өмгөөлөгч авах, мөн өмнөх хэргүүдээс гэрчийн мэдүүлгийг авч өгөөч гэсэн хүсэлтийг  шүүх бүрэлдэхүүнд гаргасан байна билээ. Хувийн журмаар авч чадахгүй байгаа учраас шүүхээр дамжуулж авах л хүсэлт юм байна. Бас зарим хүнийг гэрчээр  оролцуулаач гэсэн.

- Аль хүсэлтийг нь хүлээж авав?

- Шүүх  бүрэлдэхүүн гэрчээр хүн оролцуулахаас татгалзсан. Харин өмгөөлөгч авах хүсэлтийг нь хүлээж авлаа.  

-Таны зүгээс гаргасан шүүх хурлыг нээлттэй хийлгэх саналын тухайд?

-Хаалттай хийхээр болж байгаа. Үүнээс өмнө хойшилсон хуралдааны үеэр хаалттай хийхээр шийдвэрлэсэн учраас тэр дагуу явж байна.

-Хурандаа Цогтбаатар иргэний хэргийн шүүхэд нэр төр сэргээлгэхээр хандсан байсан. Шалтгааныг тодруулаач?

-Шүүх хурал  болоогүй учраас дэлгэрэнгүй ярих боломжгүй. Хурцын телевизээр ярьсан зүйлийг үгүйсгэх, нотлох баримтууд бий.  Бид баримтжуулаад өгсөн. Тухайн нэвтрүүлгээр Батын Хурц юу ярьсныг  монголчууд үзсэн, харсан, санаж байгаа болов уу. Сэтгүүлч Мөнхбаясгалан юу асуусан, Хурц хэрхэн хариулсан гэдгийг ард түмэн  мэдэж л байгаа.

-Хурандаа Д.Цогтбаатарыг Германы иргэний хэрэгт холбоогүй, хэрэгсэхгүй болгосон тогтоол гарсан санагдаж байна?

-Тийм. Аль эрт гарсан зүйл шүү дээ. Нийслэлийн Прокурорын тогтоол бий. Хурандаа Д.Цогтбаатар энэ хэрэгтэй хамааралгүй. Гэтэл Б.Хурц санаатай, санамсаргүйг бүү мэд эсвэл өс хонзон санаад явдаг юм уу дахиад олон нийтийн хэрэгслээр худлаа яриад байна.

-Шүүх хурал хэдий хугацаагаар хойшлов?

-Шүүх бүрэлдэхүүн 2018 оны тавдугаар сарын 2-ны өдрийн 13.00 цаг хүртэл хойшлууллаа. Энэ хугацаанд Б.Хурц өмгөөлөгч авах байх.

-Ямар нэгэн шахалт дарамт ирж байна уу?

-Мэр сэр. Тагнуулын ерөнхий газраас намайг дуудаж гэрчээр асууна гэсэн.

-Юу гэрчлүүлэх гэсэн юм бол?

- Мэдэхгүй.Би хэлсэн.Та бүхэн өмгөөлөгчийг ингэж болохгүй. Өмгөөлсөн хэргийнхээ төлөө шалгасан байгууллагад нь очиж гэрчийн мэдүүлэг өгч болдоггүй. Хуулийн талаас баталгаа бий гэдгийг хэлсэн.

-Тагнуулын байгууллага оролцох ёстой ноцтой хэрэг үү?

- Хурц нь Элчин сайд болсон. Гэхдээ хамт ажиллаж байсан хүмүүс нь тагнуулд байдаг биз дээ. Тодруулах асуудал байна, хүрээд ир гээд дуудаад л байна.

-Нэр төр сэргээлгэхээр хандсан. Хурцаас яг юу шаардаж байна гэсэн үг үү?

- Хошууч генерал Б.Хурц, хурандаа Д.Цогтбаатарыг олон нийтийн мэдээллийн хэрэгслээр дамжуулан гүтгэсэн гэж бид шүүхэд хандсан. Нэхэмжлэлдээ бид  Хурц Цогтбаатарыг яаж гүтгэсэн тэр арга хэлбэрээрээ уучлал гуйх ёстой гэж  дурдсан. Хурц Цогтбаатарыг гүтгэсэн эсэхийг шүүх эцэслэн шийднэ.

А.Эрдэнэ

www.zindaa.mn