Гурван сарын визээр очоод унадаг дугуй хулгайлсан Монголчуудын бичлэг нутаг нэгтнүүдээ ИЧЭЭВ

Зиндаа. мн сайт "Дуулиан" булангийн ээлжит дугаараар хилийн чанадад БНСУ-д үйлдэгдэж байгаа хулгайн гэмт хэргүүдийн талаар онцоллоо. Тус улсад жуулчны визээр очсон Монголчууд ч хулгайн гэмт хэрэг үйлдэх болсныг сэрэмжлүүлэг болгон хүргэж байгаа юм.

Хулгайлсан  бараагаа Монгол руу илгээдэг

БНСУ-тай Монгол Улс 1991 онд дипломат харилцаа тогтоосноос хойш гуравдагч хөршөөр нэрлэгдэх болсон. Манай улсаас олон тооны ажиллах хүчин гардаг. Бас нэг хэсэг нь зөвшөөрөлгүй  “хараар”  ажиллах нь бий. Монголчууд гэмт хэрэг үйлддэг гэдгээрээ тус оронд “ажиллах хүчин явуулдаг” улс орнуудаас тэргүүлэх хэмжээнд явдаг нь харамсалтай. Дуулиантай хэргүүд ч гарч байв. Түүний нэг нь Монгол залуус бүлэглэн нийтдээ 56 удаагийн үйлдлээр 27 тонн хоёрдогч түүхий эд хулгайлсан явдал. Тэд хулгайлсан түүхий эдээ өөр хоёрдогч түүхий эд худалдан авах газарт аваачиж зардаг байсан бөгөөд нийтдээ 160 сая воны ашиг олсон гэнэ. Ингэж хууль бусаар 300-гаад сая төгрөгний хулгайн гэмт хэрэг үйлдсэн Монгол залуус гол төлөв хөнгөн цагаан, цахилгааны утас, автомашины хуучин эд анги зэргийг хулгайлдаг байсан аж.

Монголчуудын хулгай, зодоон, танхайн гэмт хэргээс үүдэж дараа дараагийн нутаг нэгтэн олон хүнийхээ боломжийг хааж байдаг. Төр засгийн гадаадад харилцааны хувьд ч хулгай хийгээд байхаар дараачийн “Визгүй зорчуулах”  тухай яриа хэлэлцээ хийхэд ч хүндрэл учруулна. Танай монгол иргэд аялал, жуулчлалын гурван сарын визээр ирээд хулгай хийж байна. “Визгүй болгочихвол байдал бүр хүндэрнэ” гэхэд л  хэлэх үггүй болно шүү дээ.

Унадаг дугуйны хулгайч

Олон  Монгол хүний чихийг халууцуулсан мэдээ тархсан нь бас л хугайн хэрэгтэй холбоотой. Өмнөд Солонгосын Чонбуг аймгийн Вонжү хотын цагдаагийн газрын ажилтнууд Монгол Улсын хоёр иргэнийг хулгайн хэргээр саатуулжээ.Тэд Солонгос улсад гурван сарын аялал жуулчлалын визээр очсон 45, 50 настай эрэгтэй хүмүүс  гэнэ. Солонгосын цагдаагаас  Монгол иргэдэд эрүүгийн хэрэг үүсгэж, тэдний дугуй хулгайлж байгаа бичлэгийг олон нийтэд үзүүлсэн байна.

Монгол иргэд нь орой, үдшийн цагаар Вонжү хотын орон сууцны хорооллоор хэсч, орцонд түгжээгүй орхисон дугуйнуудыг хулгайлж байсан. Тэдний үйлдэл орон  сууцны орц, цахилгаан шатанд байршуулсан хяналтын камеруудад бичигдэн үлдсэн байсан гэнэ. Таван удаагийн үйлдлээр 1.500.000 төгрөгөөр үнэлэгдэх таван дугуй хулгайлж, хулгайлсан дугуйг тус бүрийг нь 100.000 төгрөг төлж каргогоор Монгол руу илгээж байснаа хүлээжээ. Бас "Дугуйг эх орондоо очоод хэрэглэх зорилготой байсан" гэж гэж мэдүүлсэн Солонгос цагдаа нар итгээгүйгээр зогсохгүй, "Тэд дугуйг Монголд очоод зарж борлуулах зорилгоор хулгай хийсэн.Мөрдөн байцаалтаас оргон зайлах үндэслэлтэй  учраас эрүүгийн хэрэг үүсгэн баривчилсан" гэжээ. Ийнхүү нутаг нэгтнүүдийнхээ чихийг халууцуулж, гурван сарын хугацаатай аялал, жуулчлалын  шугамаар очдог олон хүнд түвэг учруулж мэдэхээр дүр төрх харагдаж байна. Зөвхөн дугуйгаар зогсохгүй томоохон  худалдааны төв, захуудаар явж хулгай хийгээд баригдсан Монголчууд Өмнөд Солонгот ч бий Сингапур зэрэг улс оронд ч гарч байсан гашуун түүх бий.

  Халаасны хулгайч нар хил давж хулгайлсаар ...

Өмнөд Солонгост очсон Монголчууд хулгай хийх нь хэвийн үзэгдэл ч гэмээр болтлоо бид хайхрамжгүй хандаж иржээ. Кёнгиду ,Янгжү дүүргийн цагдаагийн газар хулгай хийсэн хэргээр Монгол улсын иргэн А -г  саатууллаа. Нутаг нэгтэй хоёр  Монгол залуугийн хамт Солонгос улсад түр ирэхдээ хулгай хийсэн.  Гудамжинд байрлуулсан автомашинуудын цонхыг хагалан, 10 сая орчим воноор үнэлэгдэх  багаж хэрэгслийг долоогийн  удаагийн үйлдлээр хулгайлжээ.

Түүнтэй  бүлэглэн хулгай хийсэн хоёр залуу мэргэжлийн гэгдэх халаасны хулгайчид ба гэмт хэрэг үйлдсэн даруйдаа  эх орон уруугаа буцаж амжсан гэдгийг Солонгосын цагдаагийн газраас мэдэгдэв.  Тэд хулгай хийх зорилгоор Солонгосыг зорьжээ.  Мөн Инчон хотын Олон улсын нисэх онгоцны буудал дээр  манай улсын эмэгтэй А-г Гаалийн татваргүй дэлгүүрээр үйлчлүүлсэн гадаадын иргэдийн халаасыг хоосолсон шуугиан гарч байв. Инчоний нисэх онгоцны буудлын дамжин өнгөрөх танхимд 8-12 цаг саатахдаа, дөрвөн орны дөрвөн иргэний таван сая 350 мянган вон хулгайлсан удаатай.  Солонгост эгч, дүү Монгол залуус хулгай хийж шүүхээс  хорих ялаар шийтгүүлсэн тохиолдол ч байгаа.  Энэ мэтээр хулгай гаарсаар. Зуны улиралд Улаанбаатарт  хүн сийрэг болохоор халаасны хулгайч нар орон нутагт болдог томоохон баяр наадмуудыг зорьж очин хулгай хийнэ. Зарим нь хил давж улс дамжиж хулгай хийдгийн жишээ дээр өгүүлсэн үйлдлүүд юм.

Д.Дамдиндорж

www.zindaa.mn